Regulasyon sa tattoo ng mga pulis rerebisahin ni PNP chief Marbil

MANILA, Philippines — Dahil sa mga natatanggap na batikos mula sa mga pulitiko ay pinarerebisa ni Philippine National Police (PNP) chief Gen. Rommel Francsico Marbil ang regulasyon hinggil sa pagkakaroon ng tattoo ng mga pulis at sa mga nais na magpulis.

Ayon kay PNP spokesperson Col. Jean Fajardo, inatasan ni Marbil ang Directorates for Personnel and Records Management (DPRM) na muling pag-aralan ang Memorandum Circular 2024-023 na nagsasaad na dapat na ipabura ang mga tattoo ng mga uniformed at non-uniformed personnel.

“Nagsalita rin ‘yung ­ating Chief PNP si Gen. Marbil at sinabi niya sa ating mga concerned directorates particularly ‘yung DPRM na muling pag-aaralan itong circular na ito dahil naipasa ito during the time ng former chief PNP Benjamin Acorda Jr.,” ani Fajardo.

Sinabi ni Fajardo na aaralin ng DPRM ang implementasyon sa pagpapabura ng mga tattoo dahil na rin sa medical at health issues.

Maging ang halaga ng pagpapatanggal ng tattoo ay posibleng maging problema ang mga pulis.

Una nang sinabi ni Fajardo na kailangan ding ideklara ng mga pulis ang kanilang mga tattoo sa katawan na hindi naman nakikita.

Hindi naman sakop ng polisiya ang aesthetic tattoos, tulad ng eyebrows, eyeliner, o lips.