Pagalingan sa tres
Dahil scrapped ang Slam Dunk competition, Three-Point Shootout ang highlight ng Skills Challenges sa 2024 PBA All-Star Extravaganza sa University of St. La Salle Gym sa Bacolod bukas at sa Linggo.
Shootout ng mga big players ang ipinalit sa Slam Dunk contest. At kasama sa sasalang sa laban sina Jason Perkins, Brandon Ganuelas-Rosser, James Laput, Sean Anthony, JM Calma, Mo Tautuaa, Isaac Go, Keith Zaldivar, Ralph Cu, Christian David, Brandon Bates at Santi Santillan.
Nakikita kong sina Santillan at Cu ang mga liyamado dahil regular silang pumupukol sa tres.
Mukhang mas mahirap pumili sa shootout ng mga guards na kinapapalooban nina title-holder Paul Lee at challengers Maverick Ahanmisi, Alec Stockton, Chris Newsome, Rob Herndon, Arvin Tolentino, Ken Tuffin, Andrei Caracut, Marcio Lassiter, Javi Gomez de Liano, Calvin Oftana at James Yap.
“Pagandahan ng gising iyan. Kung sino ang kondisyon sa araw na iyan, siya ang panalo. Walang nakakasiguro,” ani Pareng Kandong Pabaya, dating three-point shootout king sa Sabino Alley sa Maysan, Valenzuela.
Kung pagbabasehan ang three-point percentage sa regular game, malayong angat si Lassiter (82 percent). Pangalawa si Herndon (55), tabla sa pangatlo sina Lee (50) at Stockton (50), susunod sina De Liano (38) at Tuffin (38), at pawang below 30 percent na ang ibang competitors.
Pero syempre, iba ang pukol sa laro at iba ang hagis sa three-point shootout.
Sabi nila lamang ang mga set shooters dahil nakakapagod ang jump shots.
Pero parehong jump shooters sina Yap at Lee, at pareho silang nakasungkit na ng Three-Point Shootout trophy.
“Pagandahan lang talaga ng gising iyan,” giit ni Pareng Kandong.
- Latest
