Philippine wushu team magpapasiklab din

MANILA, Philippines — Magpapasiklab din ang national wushu team na sasalang sa sanda at taolu events sa prestihiyosong 15th World Wushu Championships na magsisimula ngayong araw sa Minhang Indoor Stadium sa Shanghai, China.

Babanderahan nina dating world champions Divine Wally at Arnel Mandal ang kampanya ng Pilipinas sa sanda competitions habang aariba naman sa taolu sina Agatha Chrystenzen Wong at Daniel Parantac.

Parehong nakagintong medalya sina Wally at Mandal sa 8th Sanda World Cup na ginanap sa China noong 2016. Nakapag-ambag din ng isang tanso si Wally sa 2018 Asian Games sa Indonesia.

Sa kabilang banda, nakatanso rin si Wong sa women’s taijiquan sa Jakarta Asian Games samantalang may pilak naman si Parantac noong 2014 Asian Games sa Incheon, South Korea sa men’s taijijian/taijiquan all-around event.

Sasalang din sa sanda sina Francisco Solis, Clemente Tabugara, Carlos Baylon Jr., Russel Diaz, Giddeon Padua at Jennifer Kilapio sa torneong lalahukan ng mahigit 100 bansa.

Sumailalim sa matinding pagsasanay ang mga wushu artists sa China bilang paghahanda sa world cham-pionships at SEAG.