43pts. kay Griffin

LOS ANGELES – Humataw si Blake Griffin ng season-high na 43 points at nagtala si Chris Paul ng 15 points at 17 assists para pagbidahan ang Clippers sa 124-121 overtime win laban sa Charlotte Hornets.

Nabigo ang Hornets sa kabila ng nakuhang 34 points mula kay Kemba Walker at 31 markers kay Nicolas Batum, nagtala ng 8 of 13 sa three-point line.

Nagkaroon ang Charlotte ng pagkakataong manalo sa overtime, ngunit ang malamyang pasa ni Walker ay na-dampot ni Los Angeles center DeAndre Jordan sa huling anim na segundo.

Ang follow up dunk ni Jordan mula sa mintis ni Paul ang tuluyan nang sumelyo sa panalo ng Clippers.

Halos tiyak ng Clippers ang panalo sa dulo ng regulation period nang kumonekta si Griffin ng isang 3-pointer at nakumpleto ang three-point play para sa kanilang 113-108 bentahe sa huling 48.2 segundo sa fourth quarter.

Kumamada si Walker ng isang tres at dalawang free throws sa nalalabing 11.9 segundo para itabla ang Hornets.

Tumalbog naman ang 15-foot fall-away ni Paul na nagresulta sa overtime.

Sa Oklahoma, kumolekta si Russell Westbrook ng 41 points para sa kanyang pang-29 triple-double sa season para tulungan ang Thunder na talunin ang New Orleans Pelicans, 118-110.

Sa isang highlight move ay nilusutan ni Westbrook ang 6-foot-11 at 270-pounder na si DeMarcus Cousins para sa kanyang right-handed jam laban sa bagong sentro ng Pelicans.

Nahugot si Westbrook ng ikaanim na foul ni Cousins sa huling 2:38 segundo ng laro patungo sa panalo ng Oklahoma City.

“It don’t matter how many fouls,” wika ni Westbrook. “It didn’t matter. I just jumped, and it went in to finish it.”

Umiskor si Westbrook ng career-best na 21 fourth-quarter points.

“Throughout games, I’ve got to find a better way to pick my spots,” ani Westbrook. “Tonight was the fourth quarter. Some nights it may be early, some nights it may be late.”

Nagdagdag si Westbrook ng 11 rebounds at 11 assists para sa pang-66 triple-double sa kanyang career.

Nagdagdag si Enes Kanter ng 20 points at 9 rebounds habang nagtala si Steve Adams ng 13 points at 10 boards para sa ikatlong sunod na panalo ng Oklahoma City.

Pinamunuan ni Anthony Davis ang Pelicans sa kanyang 38 points habang humakot si Cousins ng 31 points at 10 rebounds.

“We put ourselves in position to win, and when you do that, you have to make plays down the stretch,” ani New Orleans coach Alvin Gentry. “We didn’t, and they did.”