Thunder puro na sa sweep sa Pelicans
NEW ORLEANS — Humataw si Shai Gilgeous-Alexander ng 24 points para muling banderahan ang Thunder sa 106-85 paggupo sa New Orleans Pelicans sa Game Three at iposte ang 3-0 lead sa kanilang Western Conference first-round playoff series.
Nag-ambag sina Jalen Williams at Josh Giddey ng tig-21 points para sa paglapit ng Oklahoma City sa pag-sweep sa New Orleans.
Wala pang koponan sa NBA history na nakabangon mula sa isang 0-3 series deficit.
Kumonekta ang Thunder ng 17 three-point shots at naglista ng 24-point lead sa fourth quarter matapos kunin ang 60-46 bentahe sa halftime.
Umiskor si Brandon Ingram ng 19 points kasunod ang 16 markers ni CJ McCollum para sa Pelicans.
Sa Los Angeles, kumamada si LeBron James ng 30 points at humakot si Anthony Davis ng 25 points at 23 rebounds sa 119-108 panalo ng Lakers sa nagdedepensang Denver Nuggets sa Game Four ng kanilang first-round series.
Naiwasan ng Los Angeles na mawalis ng Denver sa kanilang serye.
Sa Miami, umiskor sina Jayson Tatum at Jaylen Brown ng tig-22 points sa 104-84 panalo ng Boston Celtics sa Heat sa Game Three at kunin ang 2-1 lead sa kanilang Eastern Conference first-round playoff series.
Sa Orlando, kumamada si Franz Wagner ng 34 points at 13 rebounds sa 112-89 pagdaig ng Magic sa Cleveland Cavaliers sa Game Four para itabla sa 2-2 ang kanilang duwelo.
- Latest
