PMI boxing, Garbo sa mga bol-anon

Makabungog nga kalamposan ang natagamtaman sa PMI Bohol Boxing Promotions atol sa ika-26 nga edisyon sa "Kumong Bol-anon" nilang serye nga gipahigayon niadto lamang Septiyembre 12 didto sa Bohol Wisdom School (BWS) Gymnasium sa dakbayan sa Tagbilaran.

Mao kadto ang pinakadako nga kalihukan sa boksing sa kasaysayan sa Bohol ug labing dako nga promosyon sa nasud ning tuiga. Nagpasundayag kini og usa ka International Boxing Federation (IBF) world light flyweight title eliminator ug tulo ka rehiyonal nga kampiyonato nga gilangkoban og mga boksidor gikan sa upat ka nasud.

Mismo si IBF President Daryl Peoples ang nangunay isip fight supervisor samtang ang nabantog nga reperi nga si Tony Weeks maoy mi-officiate sa main event tali sa garbo sa mga Boholano nga si Regie "Filipino Phenom" Suganob ug sa South African niining karibal nga si Sivenathi "The Special One" Nontshinga. Ang presensiya ni Games and Amusements Board (GAB) Chairman Atty. Francisco Rivera midugang sa gibug-aton sa bonggang pasundayag.

Sangko sa langit ang kalipay sa PMI Boxing kay gawas nga namunga ang ilang paningkamot, midaog sab ang tanan nilang upat ka boksidor. Tulo kanila ang gikoronahang mga kampiyon nga sila si  Leonard "The Dreamer" Pores III (IBF Pan Pacific flyweight), Reymart “Cebuano Assassin” Tagacanao (IBF Asia super flyweight), ug Datu "The Conqueror" Adam (IBF Asia junior featherweight).

Samtang ang pambato nilang si Suganob mikab-ot og tam-is nga panimalos batok ni Nontshinga, nga iyang gipatukay-ang sa ikalimang hugna. Tungod niini, si Suganob nahimong mandatory challenger ni IBF light flyweight champion Thanongsak Simsri sa Thailand. Manalipod pa hinoon si Simsri sa iyang trono batok ni Mark “Rasta Mac” Vicelles karong Septiyembre 26 didto sa Japan. Ang modaog obligado nga modepensa sunod sa iyang bakos batok kang Suganob.

Dalaygon kaayo ang nahimo sa PMI Boxing ubos sa maabtik nga pagtimon sa CEO nilang si Atty. Floriezyl Echavez Podot. Inabagan sa lokal ug probinsiyal nga kagamhanan, ilang napamatud-an nga takos ug aduna silay kapasidad nga mopasiugda og usa ka world-class boxing event didto sa ilang nataran.

Kon ang Bohol naila sa ilang Chocolate Hills, tarsier ug uban pang maanindot nga mga talan-awon, duna pa silay angayan nga ikapasigarbo. Kini way lain kondili ang PMI Boxing nga nagbutang sa ilang probinsiya sa internasyonal nga mapa sa boksing ug naghatag sa mga Bol-anon og tumang kadungganan sa kalibutanhong bantawan.