Knak awt

Bulawanong kasinatian

CEBU, Philippines — Sa akong panaw isip usa ka sports journalist sud sa tulo na ka dekada, nakahimamat ko og tulo na ka NBA legends ug nakasuwat og estorya gikan sa personal nako  nga kasinatian nila.  

Nakakita ko og kanhi bitoon sa NBA sa unang higayon niadtong 2006 sa dihang si Dennis Rodman mibisita sa Sugbo alang sa usa ka basketball exhibition game isip kabahin sa iyang "Bad Boy Tour" sa Mandaue City Sports and Cultural Complex.

Diha ko sa tungod sa dihang si Rodman pwerting nakapamalikas human giluwa ang budbud nga gideretso niya og kaon nga wala kuhaa ang panit.

Dayon niadtong 2016, usa ko sa mga nikober ni  Gary Payton sa dihang ang  NBA Hall of Famer maoy espesyal nga dinapit sa pagbukas sa labing ubang NBA Store sa Visayas diha sa Ayala Center Cebu. Niadtong tungora, dako kaayo og ngisi ni Payton sa dihang ako gihonghongan nga siya maoy labing maayong point guard nga akong gisunod sa NBA.

Ning higayona, nahatagan ko og talagsaong oportunidad nga maka-uban si Derrick Rose. Ang three-time All-Star ug labing bata nga MVP sa kasaysayan sa NBA mitikang sa Sugbo sa labing unang higayon alang sa "Rose Meets the Queen" nga kalihukan nga gipasiugdahan sa ArenaPlus.

Wala lamang ako makalamano, naka-selfie sab ko sa usa sa labing ilado nga personalidad sa basketbol nga nagpabilin ang kasikat bisan og retirado na.

Gawas nga nakighugoyhugoy sa pipila ka mga bisita, gilingaw pa sa 37-anyos nga si Rose ang mga nanambong sa ekslusibong aktibidad didto sa Shangri-La Mactan niadtong Martes sa gabii sa dihang miapil siya og sayaw sa tinikling.

Nakadayeg ko sa gipakitang kamaayo ni Rose. Gaan kaayo siya og personalidad ug maabi-abihon. Siya pa gani ang nangunay og duol sa fans nga buot magpahulagway uban kaniya.

Saludo ko sa iyang pagkamapaubsanon. Misamot akong pagdayeg niya.Human sa espesyal nga panagtapok, sangko sa langit akong kalipay sa akong eksperyensiya, nga bulawanon ug dili nako mahikalimtan sa tibuok nakong kinabuhi.