SHAABAA Season 29: Batch 2004 misakmit sa bronze medal sa Division B
CEBU, Philippines — Ang '04 The Win Batch 2004 mibugha sa Nest Workspaces Batch 2013, 91-79, sa tinagakay nilang duwa alang sa ikatulong dapit aron langkaton ang bronze medal sa Division B sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue. Si Kylle Valmoria maoy nangu sa upat ka Batch 2004 players nga mikadlit og double-double uban ang 22 puntos ug 12 ka assists nga iyang gisukipan og unom ka rebounds ug usa ka steal.
Si Franco Augusto Te miposte og 18 puntos, 11 ka rebounds ug lima ka assists, si Christopher Consunji mipupo og 12 puntos, 13 ka rebounds ug usa ka assist samtang si Ervin Lopena mitali og 12 puntos, 11 ka rebounds, duha ka assists ug usa ka steal alang sa Batch 2004, nga nagmangtas sa second half aron pagrehistro og 22 puntos nga labaw, 91-69, sa pinal nga singko minutos.
Mihimo sab og kasikas si Jedd Ryan Go uban ang 21 puntos, lima ka rebounds, duha ka assists ug usa ka steal sa dalaygon kaayong panapos sa season nga performance alang sa Batch 2004.
Gawas sa Batch 2004 ni coach Gary Cortes, ang ubang bronze medalists mao ang Big Three Pizza Batch 1996 sa Division A ug Batch 2014 sa Division C.
Sa laing bahin, ang best-of-three division finals mosikad na karong Domingo, Hulyo 19.
- Latest
