Amoroto kampeon sa All-Japan

MANILA, Philippines — Ginulantang ni Kyle Amoroto si two-time champion Johann Chua sa pamamagitan ng 11-5 demolisyon sa all-Filipino finals upang matamis na angkinin ang kampeonato sa 58th All-Japan Championship na ginanap sa Amagasaki sa Osaka, Japan kahapon.

Mainit ang simula ni Chua na naglatag agad ng 3-0 kalamangan sa pagsisimula ng laban.

Subalit matikas ang pagresbak ni Amoroto nang sumagot ito ng impresibong 5-0 run para maagaw ang bentahe sa 5-3.

Nagawang makadikit ni Chua sa 4-5 nang walisin nito ang ninth rack bago muling lumayo sa 7-4 si Amoroto.

Sinubukan pang manatili ni Chua sa kontensiyon nang lumapit ito sa 5-7.

Subalit iyon na lamang ang nakayanan ni Chua nang muling magpasabog ng solidong 4-0 ratsada si Amoroto para makuha ang panalo.

Bago makapasok sa finals, dumaan muna sa butas ng karayom sina Chua at Amoroto sa kani-kanyang semis matches.

Isang all-Filipino showdown ang nangyari sa semis.

Nanaig si Chua laban sa kababayang si Rommel Santos sa pamamagitan ng pukpukang 11-10 desisyon habang nanalo naman si Amoroto sa beteranong si Antonio Lining sa hiwalay na semis game sa bendisyon naman ng 11-9 panalo.

Target sana ni Chua na makuha ang ikatlong korona matapos pagharian ang All-Japan noong 2015 at 2017 edisyon.