Semis ikakasa ng San Beda

MANILA, Philippines — Hangad ng Marinerong Pilipino-San Beda ang isa sa dalawang outright semifinal ticket, habang bonus sa quarterfinals ang puntirya ng CCI-Yengskivel sa 2024 PBA D-League Aspirants’ Cup.

Haharapin ng Red Lions ang Centro Escolar University Scorpions ngayong alas-7:30 ng gabi matapos ang pagkikita ng Go Torakku-St. Clare at CCI-Yengskivel sa alas-4:30 ng hapon sa Ynares Sports Arena sa Pasig City.

Bitbit ng Marinerong Pilipino-San Beda ang 3-0 kartada sa ilalim ng 4-0 record ng nagdedepensang EcoOil-La Salle, habang dala ng CEU ang 2-1 baraha.

“We expect the games to be tougher and we can’t take any team for granted,” ani Red Lions coach Yuri Escueta. “Our goal is to make the Top 2 and we expect a tough game against CEU to achieve that goal.’

Determinado rin ang Scorpions na gulatin ang Red Lions para mapalakas ang tsansa sa outright spot sa Final Four.

“Underdog mentality talaga kami coming into this league,” wika ni CEU menor Jeff Perlas. “It’s a much tougher competition, especially with the presence of UAAP and NCAA champions. We’ll be ready.”

Walang koponang mapapatalsik sa pagtatapos ng single-round eliminations. Ang top two teams ang makakakuha ng automatic semis berths at ang third at fourth squads ay mabibigyan ng ‘twice-to-beat’ bonus sa quarters.