"Kumong bol-anon 15" card sa PMI boxing kumpleto na

CEBU, Philippines — Ang PMI Bohol Boxing Promotions nga gipangulohan ni Atty. Floriezyl Echavez Podot mipahibawo sa kumpletong linyada sa mga away alang sa giatngan nilang "Kumong Bol-anon 15" nga pasundayag karong Abril 30 didto sa Holy Name University (HNU) Gymnasium sa siyudad sa Tagbilaran.

Si Regie “The Filipino Phenom” Suganob (14-1, 4KOs) mowadwad na sab sa iyang abilidad sa main event diin iyang depensaan ang iyang World Boxing Organization (WBO) Global light flyweight belt batok sa 27-anyos nga Hapon nga challenger nga si Kai Ishizawa (11-3, 10KOs).

Mao kini ang labing unang higayon nga mo-away ang usa ka boksidor gikan sa Japan sud sa tulo ka tuig nga kasaysayan ning malampuson nga boxing series.

Si Suganob, nga rated No.3 sa WBO, No.9 sa WBC, ug No.6 sa IBF, manalipod sa unang higayon sa trono nga iyang nasakmit human gibuntog si Venezuelan Ronald Chacon pinaagi sa unanimous decision niadtong Nobiembre 4 sa miaging tuig didto sa Bohol Wisdom School (BWS) gym.

 Tataw nga makapadasig ang maong kadaogan sa pambato sa Dauis, Bohol nga si Suganob human siya napilde pinaagi sa unanimous decision batok ni IBF 108-pound champion Sivenathi Nontshinga sa una niyang world title fight niadtong Hulyo 2, 2023 didto sa International Convention Center sa East London, South Africa.

Sa supporting main event, si "Sugar" Shane Gentallan (8-1, 5KOs) makighilam-osay og kumo ni Indonesian Wandi Priman Hulu (2-1-1).

Dili na bag-o alang kang Gentallan ang pakigharong batok sa Indon nga kontra. Niadtong Pebrero 2023, ang garbo sa Maribojoc mi-knockout sa kababayan ni Hulu nga si Faisol Akbar sud lamang sa duha ka hugna aron birahon ang WBO Oriental Youth minimumweight title didto sa Calape Cultural Center.

Sa espesyal nga engkwentro tali sa mga babayeng boksidor, si Althea Shine Pores sa Claveria, Misamis Oriental mosakbang ni Renz Dacquel sa Manila alang sa korona sa Philippine women's light flyweight division.

Mokumbati sab silang Sugarey Leonard Pores vs Roel Julian sa Bukidnon; Angilou Dalogdog sa Bilar, Bohol vs Rolan Jay Biendima sa Elorde Gym; Arlando Senoc Jr. sa Big Yellow Stable sa Cebu vs Kier Torregosa sa Buenavista, Bohol;ug Leonard Pores vs Jaren Jase Guarin sa Haiyan Punch Boxing sa Tacloban.   

Ang mga tickets nagkantidad og P200 sa general admission A, P500 sa general admission B, ug P1,000 sa VIP/ringside.