Mga binyu sa Palaro 2024 gibutyag
CEBU, Philippines — Gawas sa chess, ang organizing committee nga gipangulohan ni Cebu City Sports Commission (CCSC) chairman John Pages mibutyag sa opisyal nga mga binyu alang sa nagkadaiyang duwa sa 64th Palarong Pambansa lima ka bulan gikan karon.
Sa kinatibuk-an, 24 ka events ug upat ka special games ang kumbatihan ning usa ka semanang torneyo nga torneyo nga mosikad pinaagi sa usa ka bonggang semonyas sa pagbukas karong Hulyo 9 didto sa Cebu City Sports Center. Matapos kini sa Hulyo 16.
Kumbatihan ang medal-rich athletics ug swimming sa CCSC, samtang ang aksiyon sa basketball ipahigayon sa Cebu City Sports Institute, University of San Carlos-Main ug USC-North, ug Cebu Eastern College (CEC).
Ang archery sa Filinvest/SRP, arnis sa University of the Visayas (UV), dancesport sa Gmall, football sa Don Bosco Technical College (DBTC), CCSC, Dynamic Herb Sports Complex, ug USC-Talamban, futsal sa DBTC, table tennis sa Cebu Technological University (CTU)-Main, ug taekwondo ug wrestling sa SM Seaside City.
Banatan ang lawn tennis sa Citi Green/Alta Vista/Villa Aurora/Camp Lapu-Lapu Tennis Club, volleyball sa University of San Jose-Recoletos (USJ-R) ug University of Southern Philippines Foundation (USPF), ug ang gymnastics sa Sacred Heart School-Ateneo de Cebu (SHS-AdC), Cebu Institute of Technology-University (CIT-U), ug Southwestern University (SWU)-Phinma.
Ang kompetisyon sa sepak takraw adto sa SHS-Ateneo, pencak silat sa Il Corso Mall, softball ug baseball sa Filinvest City de Mare, wushu sa University of Cebu (UC)-METC, badminton sa MetroSports Center, billiards sa City Mall, ug boxing sa Cebu Coliseum.
Ang special games sa swimming ug athletics adto sa sports center, samtang ang bocce ug goal ball sa Bright Academy.
Mao kini ang labing unang higayon sud sa 30 ka tuig nga ang Sugbo mo-host ning prestihiyosong paugnat sa kusog alang sa mga estudyanteng atleta sa elementarya ug high school lukop nasud ug ikatulo sa kinatibuk-an sukad niadtong 1954. Katapusan kining nahitabo sa siyudad niadto pang 1994.(CEBU NEWS)
- Latest
