UC Webmasters nalandig sa ikatulong puwesto

CEBU, Philippines — Ang University of Cebu (UC) Webmasters mipiog sa AC Hoopers sa makapaisa'g balahibo nga desisyon, 72-71, aron birahon tropeyo sa ikatulong dapit sa Zamboanguita Open Basketball Tournament 2024 ning bag-ohay pa lamang sa Zamboanguita municipal gymnasium sa Negros Oriental.

Si Rey Sordilla maoy nangu sa UC uban ang 1 puntos samtang si Tosh Sesay midugang og 12 puntos ug pito ka rebounds aron tabangan ang Webmasters pagsakmit og  bronseng medalya sa lima ka adlaw nga torneyo nga kabahin sa Patsada Events sa Zamboanguita.

Sila si Zareygel Rosano ug Jasper Pacana mihimo sab og kasikas bitbit ang nuybe puntos matag usa samtang si Danie Boy Lapiz midonar og siyete puntos alang sa Webmasters, nga miposte og otso puntos nga labaw sa halftime, 40-32.

Ang AC Hoopers nakasikit ngadto na lang sa tres puntos, 48-51, human sa tulo ka kuwarter, apan ang Webmasters nagpabiling kalmado taliwala  presyur aron pagipsot ngadto sa usa ka lugas nga kadaogan.

Ang pagsalmot sa kompetisyon didto Zamboanguita kabahin sa hugot nga preparasyon sa UC alang sa umaabot nga Cebu Schools Athletic Foundation, Inc. (CESAFI) Season 24 nga gikatakdang mosikad karong Septiembre.

Ubos sa pagtimon ni coach Atty. Kenneth Kernn Sesante, ang Webmasters nanghinaut nga malangkat ang gihandum nilang korona human sila gipilde sa University of the Visayas (UV) Green Lancers sa miaging duha ka CESAFI Finals.