Spurs miputol sa nagkadena nilang malas
CEBU, Philippines — Gipakgang sa San Antonio Spurs ang franchise record nilang 18 ka sagunson nga pilde.
Kini human ilang gipabuhas ang Los Angeles Lakers, 129-115, sa NBA kagahapong adlawa didto sa Frost Bank Center sa San Antonio, Texas.
Si Devin Vassell mipabuhagay og career-high nga 36 puntos alang sa Spurs. Mikuha sab og atensiyon ang star rookie sa Spurs nga si Victor Wembanyama uban ang 13 puntos, 15 ka rebounds, lima ka assists, duha ka blocks, ug duha ka steals. Samtang ang pilderong Lakers gipangulohan ni LeBron James bitbit ang 23 puntos, pito ka rebounds, ug 14 ka assists. Samtang nakaginhawa na gamay ang Spurs, padayong nagkagidlay ang Detroit Pistons nga misukarap sa ika-22 nilang sunodp-sunod nga pilde human gilat-an sa Philadelphia 76ers, 124-92. Si Joel Embiid mipupo og 35 puntos ug 13 ka rebounds sa ikalimang sunod-sunod nga daog sa Sixers.
Didto sa Phoenix, si Jalen Brunson way sipyat sa gitira niyang siyam ka tres dayon na ngadto sa pagbubo og career-high 50 puntos nga nagtuboy sa New York Knicks ngadto sa 139-122 nga pagpasaop sa Suns.
Samtang ang Boston Celtics nagpabiling way pilde didto sa ilang korte human gipaksit ang Orlando Magic, 128-111, ubos sa pagpangu ni Jayson Tatum nga mipaulbo og 30 puntos.
- Latest
