Harden I-trade sa Sixers ngadto sa La Clippers

CEBU, Philippines —  Ang Philadelphia 76ers hingpit nang miuyon nga i-trade si NBA star James Harden ngadto sa Los Angeles Clippers.

Si Adrian Wojnarowski sa ESPN maoy unang misabwag ning maong taho sa X, nga mao kanhi ang Twitter.

Misunod sab dayon si Shams Charania sa The Athletic. Matud pa ni Charania nga ang Sixers molabay nilang Harden ug PJ Tucker ngadto sa Clippers hulip nilang Nicolas Batum, Marcus Morris, Robert Covington, KJ Martin, ug mga draft picks.

Si Harden, nga matuldokan na ang panagbangi nila sa 76ers, moporma og gamhanang trianggulo uban nilang Kawhi Leonard ug Paul George sa Clippers.

Ang 34-anyos nga si Harden wala pa makaduwa sa pre-season ug ingon man sa regular season alang sa Sixers.

Nagkasungi sila ni 76ers team president Daryl Morey nga iyang gihulagway nga usa ka dakong bakakon.

Si Harden hugtanong namahayag nga dili na mahilot pa ang gusot nilang Morey hinungdan nga sa kadugayan nakahukom ang Sixers nga i-trade ang three-time NBA scoring champion ngadto sa Clippers.

Mao gyud kini ang gusto nga mahitabo ni Harden gikan pa sa sinugdanan sa ilang negosasyon ni Morey.