Nuggets, Pacers nakabawos

CEBU, Philippines — Nakabawos ang defending champion Denver Nuggets ug ang Indiana Pacers batok sa tagsa-tagsa nila ka mga karibal atot sa Game 3 sa nagkainit nga best-of-seven NBA conference semifinals kagahapong adlawa.

Sa Western Conference, sila si three-time MVP Nikola Jokic ug Jamal Murray mikadlit og 24 puntos matag usa sa dihang gibaslan sa Nuggets ang Minnesota Timberwolves, 117-90. Si Jokic milangkat sab og 14 ka rebounds ug mipasa og siyam ka assists, samtang si Murray mipasud og 11 sa 21 niya ka itsa  alang sa Nuggets, nga miputol sa labaw sa Wolves ngadto na lang sa 2-1.

Dominante kaayo ang Nuggets nga sa usa ka higayon naglabaw og 34 puntos nga gikadismaya og maayo sa bagang panon sa mga fans sa Wolves nga nagdasok didto sa Target Center sa Minneapolis.

Si Michael Porter Jr. miamot og 21 puntos alang sa Nuggets, kansang lima ka starters mitali tanan og double figures. Nangu sa pilderong Wolves mao si Anthony Edwards uban ang 19 puntos samtang si Karl-Anthony Towns nalimitahan ngadto lamang sa 14 puntos.

Didto sa Indianapolis, ang Pacers miresbak sab sa New York Knicks, 111-107, aron paglikay nga mahug sa 0-3 nga kawot sa ilang East series.

Si Tyrese Haliburton mipabuto og 35 puntos, apan si Andrew Nembhard ang nahimong surprisa nga bayani sa Pacers human kini milansang og krusyal nga 3-pointer nga nakapalabaw kanila sa hingpit, 109-106, sa pinal nga 17.8 segundos.

Midonar si Pascal Siakam og 26 puntos, samtang si Myles Turner mitimbre og 21 puntos ug 10 ka rebounds alang sa Pacers.

Napiangan hinoon og maayo ang Knicks kay wala ang upat nila ka mga sinaligan nga sila si Julius Randle, Mitchell Robinson, Bojan Bogdanovic ug OG Anunoby kay dunay gihambin nga angol.

Si Donte DiVincenzo miposa og pito ka tres sa iyang 35 puntos, samtang si Jalen Brunson mihipos og 26 puntos ug unom ka assists apan dili kini igo alang Knicks.