AJM, Donling buhi pa sa semis sa Ranny Colansi Cup 2023

CEBU, Philippines — Nangayo pa'g overtime ang Ate Jhesscan Mananahi (AJM) una nila maangkon ang kutas ug kulba nga kadaogan batok sa CJL Sniper, 77-74 pagtapos sa elimination round sa Ranny Colansi Cup 2023 sa miaging gabii diha sa Ateneo de Cebu sa Mango Avenue, Cebu City.

Upat ka AJM players ang mitala'g double figures sa pagpangulo sa best player niining si Brixter Villarias nga mikamada'g 21 puntos, lakip na ang iyang 3-point shot sa nahabiling tres segundos sa regulasyon nga mitabla sa iskor, 66-all ug mipuwersa sa duwa ngadto sa overtime. Sa dugang singko minutos, kontrolado na sa AJM ang duwa.

Ang AJM ni team owner Jessica Caneda nakakuha sab og igong suporta gikan ni Kirby Caneda nga mitali'g 20 puntos, samtang sila si Joseph Villarias ug Kevin Caneda mitampo'g 12 ug 10 puntos alang sa ilang 4-3 nga baraha.

Ang CJL ni James Lapinig gipangulohan ni Michael Tan, kinsa mipabuto'g 22 puntos, gisundan ni CJ Monterola nga mikadlit og 16 puntos. Si Johnas Malubay mipunting og 12 puntos sa 2-5 nga AJM, kinsa nanamilit na sa maong liga nga giorganisar sa Brothers Ball League ubos sa pagpangulo ni Marvin Sillar.

Sa laing duwa, ang Donling Aircon Refrigeration Services milansang og 69-61 nga kadaogan aron sab palayason ang Cebu Locksmith bitbit ang 1-6 nga baraha.

Si Homer Rosales miposte'g 13 puntos ug upat ka rebounds aron mangu sa opensa sa Donling, ingon man best player of the game. Sila si James Carl Lumoya ug Jessie Sanchez nag-amotay'g 12 ug 10 puntos sa team ni Romeo Quilaton Jr. nga buhi pa alang sa semifinals.

Ang natagak nga Cebu Locksmith ni Nestle Key Flores gipangulohan ni Bernlenard nga miligwat16 puntos, gisundan ni Michael Daan nga dunay 14 puntos ug Marco Villacorta sa iyang 10 puntos.