Clarin, Pag-IBIG tandem para sa mga pro athletes

MANILA, Philippines — Nakipagtulungan ang Games and Amusements Board (GAB) sa Pag-IBIG Fund (HDMF) para suportahan ang mga Filipino professional athletes.

Kaugnay pa rin ito ng ‘3xPRO’ advocacy ni GAB chairman Atty. Richard S. Clarin na ‘promote, professionalize, protect’ ng mga pro athletes.

Noong Agosto 3 ay nagpulong sina Clarin, GAB Chief of Staff Atty. Regino Mallari Jr., GAB Chief Relations Officer Mark Fabie, Pag-IBIG Fund Chief Executive Officer Marilene C. Acosta, Deputy Chief Executive Officer for Home Lending Operations Cluster Benjamin R. Felix Jr., Senior Vice President for Member Services Operations Sector Atty. Marie Antoniette D. Diaz at OIC of Member Relations Department Janice Anne P. Delmo.

Napag-usapan ang financial literacy program, pagbibigay ng access sa high-interest MP2 savings scheme, pagpapabilis ng housing and short-term loan program at pagkakaroon ng Pag-IBIG Loyalty Card Plus.

Ang nasabing card ay magkakaloob sa mga GAB employees at GAB licensee pro athletes ng exclusive discount at reward sa mga groceries, tuition fees, hospital bills, fuel expenses, restaurant bills at iba pa sa lampas 300 partner-establishments sa buong bansa.

Dahil dito sa tambalan ng GAB at ng Pag-IBIG ay makikinabang ang mga professional athletes.