Amicis Basketball League Season 3  mosikad sa Enero 14

CEBU, Philippines —  Miabot ngadto sa 14 ka teams ang magtige sa Amicis Basketball League (ABL) Season 3, nga gikatakdang mosikad karong Enero 14 didto sa Consolacion covered court.

Mopakita'g aksiyon mao ang Amigos, YYBC, A2E Cargo Logistics, Soo Good, Golden Eagle, Artera, Prayboys, We Care, Sugbuhanon Maharlika, Lord Vincent, Level Up, Cebu Queseo Eagles Club, Lodi Petmalu, ug RCBC Gamsi.

Gibahin sila sa duha ka brackets.

Ang top 4 teams matag bracket mo-abante sa quarterfinal round diin ang No.1 ug No.2 dunay twice-to-beat advantage. Ang mga mananaog motikang sa knockout semifinals ug dayon sa tinagakay sab nga kampiyonato.

Gawas sa mga tropeyo, ang makampiyon mobulsa og P20,000, samtang ang mopahiluna sa ikaduha ug ikatulong  dapit makadawat og P10,000 ug P5,000.

Ang tanang mga duwa ubos sa superbisyon ni league commissioner Lee Mhar Dahil inabagan ni deputy commissioner Agvin Jugan ug technical head Louie Cuenca.