Jam naka-eskapo sa JD&M sa CABL Dabarkads Cup 2020

CEBU, Philippines — Naka-eskapo ang Jam Customs Brokerage bitbit ang 72-71 nga kadaogan batok sa JD&M Customs Brokerage sa  Cebu Aduana Basketball Legends (CABL) Season 3 Dabarkads Cup 2020 niadtong Sabado diha sa Tinago gym, Cebu City.

Naka-anghel sa Jam Customs Brokerage mao si Boodee Monteño human niya mapasulod ang iyang krusyal nga itsa sa kilid nga bahin sa nahibiling singko segundos. Si Monteño mihipos og 15 puntos nga maoy ikaduhang topscorer sa Jam sunod ni Ryan Barral, kinsa mikolekta og 17 puntos.

Anaa na unta sa baba sa kadaogan ang JD&M dihang labaw sila og usa ka lugas, 71-70, apan gibaraw kini ni Monteño pinaagi sa iyang marka-bahala nga itsa.

Ang Jam ug JD&M pareho nang nagbitbit og 1-1 nga baraha ning maong liga nga gidumala nilang Sidney Ganapin, Noel Medalle, Ferdi Sigue, Janno Boniao ug Jun Gayo.

Si Marvin Sillar nga miiskor og sayes puntos sa una nilang duwa, maoy nangu sa JD&M dihang mipatuasik kini og 18 puntos, gisundan ni Ferdinand Sigue nga miantog og 15 puntos.

Sa laing duwa, ang Gate Keeper milansang sa ilang ikaduhang sunod-sunod nga daog pinaagi sa paglubong sa Petracorta Customs Brokerage sa iskor nga 73-56.

Ang Gate Keeper nga kasamtangang nag-una sa standing sa ilang 2-0 win-loss record, gipangulohan ni Becking Rollon nga miburak og 22 puntos, samtang si Jojo Quiño mibahog og 15 puntos.

Gipangulohan gihapon nilang Francis Palero ug Takloy Moral ang Petracorta nga nagkumbinar og 27 puntos. Si Palero miiskor og 15 puntos, samtang si Moral adunay 12 puntos sa naparot nga Petracorta nga aduna na sa'y 1-1 nga baraha.

Sa lain pang duwa, ang Thor & GJA milubong sab sa Alas Logistics Corp., 88-74 alang sa ilang 1-0 nga baraha.

Miwadwad og maayo si James Jordan ug miiskor kini og 27 puntos aron pangulohan ang Thor & GJA.

Mikayod sab si Jim Villa aron motampo og 23 puntos, samtang si Mark Tan miamot og 10 puntos sa kadaogan sa Thor & GJA.

Ang Alas Logistics nga gipahamtangan sa ikaduhang sunod-sunod  niini nga pilde, gipangulohan nilang Toper Marata ug Junard Ciabo nga mikamada'g 13 og 12 puntos.

Ang Alas Logistics mao na karon ang nangiwit sa standing uban ang 0-2 nga baraha.