Lassiter dili makaduwa sa FIBA World Cup

CEBU, Philippines – Nawagtangan og kasaligang shooter ang Gilas Pilipinas nga moduwa sa FIBA World Cup didto sa China sunod bulan.

Kini tungod kay si Marcio Lassiter dili makauban sa koponan human makaangkon og seryosong injury sa tuhod atol sa San Miguel Beermen ug NorthPort Batang Pier niadtong Miyerkules.

Si Lassiter wala katiwas sa duwa human magbangga iyang tuhod ug sa tuhod ni Batang Pier guard Garvo Lanete diin siya ang  nagrabihan.

Sa gihimong MRI sa iyang tuhod, nakit-an nga aduna siya'y MCL sprain nga kinahanglan ipahuway og unom ka semana. Gawas nga kinahanglan siya morekober, dili na usab siya kasalmot sa ensayo sa Gilas ug maoy hinungdan nga gitangtang na siya sa line-up  sa national team.

Dako unta og matabang si Lassiter tungod kay usa siya sa mga saligang gunner sa Gilas nga magsalig sa ilang long-distance shots batok sa mas dagkong players sa Italy, Angola ug Serbia.

Sa pagkawala ni Lassiter, bugtong saligan nga shooters ni Gilas coach Yeng Guiao mao na lang sila si Roger Pogoy ug Matthew Wright.