Tepora mo-debut karon sa us

CEBU, Philippines — Ang wala pa'y pildeng Sugboanong featherweight boxer nga si Jhack 'El Capitan' Tepora (22-0, 17KOs) moaway sa labing unang higayon didto sa Amerika batok ni Jose Luis Gallegos (16-6, 12KOs) karong adlawa didto sa Soboba Casino Resort sa San Jacinto, California.

Si Tepora gikatakda unta nga modepensa sa iyang WBA featherweight title batok ni Hugo Ruiz sa undercard sa Manny Pacquiao-Adrien Broner pay-per-view showdown niadtong Enero didto sa Las Vegas, apan nalangkatan siya sa iyang korona gumikan kay overweight.

Karon nga iya nang gilubong sa kalimot ang tanan, ang 24-anyos nga si Tepora nanghinaut nga mopakli og bag-ong panid sa iyang karera ug buot niyang sugdan kini pinaagi sa paghimo og impresyon batok ni Gallegos.

"Importante kaayo ni nga away para nako. Akong ihatag ang tanan kay gusto nako nga i-refresh ang ako career," matud pa ni Tepora nga wala na makaaway pa sukad iyang gipalukapa si Edivaldo Ortega sa ikapitong hugna aron birahon ang WBA featherweight belt niadtong Hulyo sa miaging tuig didto sa Axiata Arena sa Kuala Lumpur, Malaysia.

Ang kababayan ni Tepora nga si Marlon 'Nightmare' Tapales (32-2, 15KOs) nga kanhi usa sab ka world champion moaway sa susamang baraha batok ni Roberto Castaneda (23-11-2, 16KOs).

Sama ni Tepora, si Tapales nahuboan sab sa iyang bakus isip WBO bantamweight champion kay wala sab makakuha sa ensaktong timbang duha ka tuig na ang milabay.

Si Tapales nga wa'y pilde sud sa 11 ka away sukad niadtong 2013, mo-away sa Amerika sa ikaduhang higayon. Sa una niyang salida sa US, iyang gipaundang si Fernando Vargas Parra sud lamang sa duha ka hugna niadtong Pebrero didto sa Microsoft Theater sa Los Angeles.

Sila si Tepora ug Tapales parehong ubos sa paggiya ni US-based Cebuano trainer Rodel 'Batang Mandaue' Mayol nga kanhi world champion sab.

"Dili lang gyud sila mokompiyansa sa tagsa-tagsa nila ka mga kontra kay pulos naay kusog. Dako nuon sila'g tsansa modaog kun motuman lang sila sa amo fight plan," matud pa ni Mayol.