Monterroyo-Jordan, Casili Abante semis sa laba Sinulog Cup 2019
CEBU, Philippines – Nabira dayon sa 'twice-to-beat' Monterroyo-Jordan ug sa Team Casili ang unang duha ka lingkoranan sa semifinals human midaog batok sa tagsa-tagsa nilang kaatbang sa LABA Sinulog Cup 2019 niadtong Lunes didto sa Co Tiao King gym sa Tabok, Dakbayan sa Mandaue.
Ang Monterroyo-Jordan yano kaayong misulod sa semis dihang ilang gilubong ang Zolita, 75-60 ubos sa pagpangulo sa 'twin-tower' niini nga silang Michael Tañan ug Tawing Grafe nga nagkumboya'g 30 puntos. Si Tañan mitikdol og 16 puntos, samtang si Grafe mitimang og 14 puntos sa Monterroyo-Jordan, kansang tres puntos nga labaw sa halftime, 26-23 takulahaw lang miburot sa sayong bahin sa third quarter, 38-23.
Mitubo pa ang ilang labaw ngadto sa 20 puntos, 68-48 sa kapin kuwatro minutos ang nahibiling oras sa duwa nga maoy ilang hagdanan aron makab-ot ang daog.
Ang co-managers nga sila si Dr. Raul Monterroyo ug Richard Jordan nag-amotay og nuybe puntos alang sa ilang koponan.
Ang Zolita ubos sa liderato ni Tabok Barangay Captain Dario Tarriman gipangulohan sab nilang Banjo Hatamosa, Neil Marturillas ug Ingoy Suico nga parehong mitimbre'g 10 puntos.
Sa laing bahin, ang Casili nilang Nonoy Sajot ug Dexter Suico midaog sab human makaipsot batok sa Explore Travel & Tours ni William Oljol sa iskor nga 61-59.
Dumadaog na unta ang Explore Travel & Tours dihang naglabaw sila og dos puntos, 59-57 sa himalatyong segundos sa duwa, apan napawong ang ilang paglaum dihang nakahimo sila og turnover.
Si Rex Gonzaga maoy nangu sa Casili sa iyang 16 puntos, gisundan ni Dindo Aligway nga adunay 11 puntos.
Sila si Francis Palero ug Ramil Estremos mao sab ang nangulo sa Explore Travel & Tours nga gipaluyohan sab nila ni Dr. Jun Borces, Roy Ermac ug Eboy Quiñahan.
Ang liga namugma pinaagi sa paningkamot ni Police Captain Dondon Coloscos sa abag nilang Roy Ermac ug Macmac Borja.
PUNTOS MATAG USA
Unang duwa:
CASILI (61) – R. Gonzaga 16, D. Aligway 11, Aligway 9, Amaga 7, Sajot 4, Cabigas 4, Suico 2, Cabatingan 2, Anoya 2.
EXPLORE Travel & Tours (69) – Palero 10, Estremos 10, Madrid 8, Borces 6, Taghoy 5, Ebyong 4, Alburo 4, Ornopia 3, Ermac 3, Quiñahan 2, Magale 2, Oljol 2.
Ikaduhang duwa:
MONTERROYO-Jordan (75) – Tañan 16, Grafe 14, Monterroyo 9, Jordan 9, Mendoza 6, Armero 5, Monsanto 4, Catinoy 4, Delima 3, BJ 3, Yares 2, Yu 1.
ZOLITA (60) – Hatamosa 10, N. Marturillas 10, Suico 10, Pepito 8, M. Marturillas 8, Ricasa 6, Drilon 4, Florentino 3, Matus 2.
- Latest
