Blue Eagles dinagit ang ika-2 dikit na panalo

MANILA, Philippines — Nalusutan ng Cignal-Ateneo de Manila University ang mainit na simula ng Family Mart-Enderun upang kunin ang 82-68 panalo kahapon sa 2019 PBA D-League sa Paco Arena sa Manila.

Matayog ang lipad ni Tyler Tio nang humataw  ng 20 puntos tampok ang 14 sa payoff period kung saan naglista ito ng impresibong 6-of-9 shooting clip sa three-point territory.

Nagtala rin si Tio ng limang assists at dalawang rebounds para sa Cignal-Ateneo.

Nagpasabog din si Ivorian center Ange Kouame ng 20 puntos, walong rebounds, limang blocks at dalawang assists habang nag-ambag si William Navarro ng siyam na puntos, 15 boards, tatlong assists, isang steal at isang block.

Ito ang ikalawang pa­nalo ng Blue Eagles para makuha ang solong pamumuno sa Aspirants Group.

Mula sa dikitang laro sa unang tatlong kanto, sumabog si Tio sa fourth quarter para hatakin ang Cignal-Ateneo sa 19 puntos na kalamangan, 79-60.

Mula rito ay hindi na lu­mingon pa ang Blue Eagles para sa panalo.