Pinoy artists tutumbok na
MANILA, Philippines — Magpapasiklab ang pitong mahuhusay na cue masters sa pagsisimula ng prestihiyosong 2018 World 9-Ball Championship na ginaganap sa Al-Attiya Sports Arena sa Al-Arabi Sports Club sa Doha, Qatar.
Unang sasalang ang Pinoy artists sa group stage na magpapatupad ng double-elimination format.
Bumabandera sa kampanya ng Pilipinas si reigning champion Carlo Biado na uumpisahan ang pagdepensa sa titulo laban kay George Llanos ng Argentina sa Group 9.
Aarangkada rin sina Jeffrey De Luna, Roland Garcia, Johann Gonzales Chua, Israel Rota, Jeffrey Ignacio at Marlon Manalo sa torneong may basbas ng World Pool Billiard Association.
Unang makakasagupa ni De Luna si Sami Koylu ng Turkey sa Group 2 habang lalarga si Garcia kontra kay Hsu Jui Anh ng Chinese Taipei sa Group 3.
Masisilayan naman si Chua laban kay Sanjin Pehlivanovic ng Bosnia and Herzegovina ng Group 4 habang aarangkada sina Rota laban kay Francisco Diaz-Pizarro sa Group 5, Ignacio laban kay Abdullah Alenzi ng Kuwait sa Group 6 at Manalo laban kay Wang Can ng China sa Group 10.
- Latest
