Wilder-Fury 'rematch' aprubado na sa WBC

CEBU, Philippines — Giaprubahan na sa World Boxing Council ang direktang 'rematch' tali nilang WBC heavyweight champion Deontay Wilder  (40-0-1, 39KOs) ug Tyson Fury (27-01, 19KOs), kansang away natabla usa ka semana ang milabay didto sa Los Angeles.

Mismo si WBC President Muricio Sulaiman ang namahayag nga nindot kaayo ang away nilang Wilder ug Fury ug angayan lamang nga hagatan og higayon nga mag-abot pag-usab ang duha  ka  walay  pildeng  boksidor.

Si Wilder nagpabiling kampiyon human ang 12 ka hugna  nilang away ni Fury nga nakontrobersiyal human  gideklara nga tabla ang away.  

Daghan ang nagtuo nga si Fury mao unta ang daog sa maong away bisan og kaduha kini malukapa.

Human sa ilang bugno, si Fury nagkanayon nga buhaton ni Wilder ang tanan aron molihay kini sa ilang 'rematch'. Apan gipagya siya ni Wilder human kini mipahibawo nga ang 'rematch' nilang Fury maoy iyang prayoridad ug dili ang usa ka unification bout batok ni WBA, IBF ug WBO champion Anthony Joshua.