CLBA andam na modawat og mga miyembro
CEBU, Philippines - Ang mga organizers sa bag-ong natukod nga ballclub nga gitawag og Cebu Legends Basketball Association (CLBA) nanawagan sa mga basketbolista nga nagpangedaron og 40-anyos pataas sa pagsalmot sa pagahimuong practice game karong gabii.
Anha kini ipahigayon sa Housing gym sa Barangay Canduman, dakbayan sa Mandaue gikan sa alas-6 hangtod sa alas-10 sa gabii.
Ang practice game himuon kaduha sa usa ka semana sa matag adlaw nga Miyerkules ug Huwebes sa susama gihapon nga oras.
Si P/Insp. Dondon Coloscos nga maoy utok sa pagporma sa maong CLBA uban ni Tony Alcover miingon nga himuon niyang balanse ang liga.
“Kini nga liga fair gyud ang kompetisyon, dili ni palig-onay. Bahigon nato og sakto ang team aron patas. Ang ato giapas niini kay physical fitness, lingaw-lingaw ug pagpalig-on sa panaghigalaay sa mga miyembro sa ballclub,” matud pa ni P/Insp. Coloscos.
Dugang pa ni P/Insp. Coloscos, nga ang matag team mahimong makakupot og upat ka protected players.
Niadtong interesado nga magpa-miyembro sa maong ballclub, mahimong motambong sa praktis karong gabii. Alang sa dugang mga kasayoran, mahimong mokontak ni P/Insp. Coloscos sa 09235767419. (BANAT NEWS)
- Latest
