Mayweather-Pacquiao ‘rematch’ nabanhaw

CEBU, Philippines - Ang kalampusan nga natagamtaman ni Manny Pacquiao batok ni Jessie Vargas sa miaging adlaw   nakabanhaw alang sa gihandum nga “rematch” tali sa Pinoy ring superstar ug sa mortal niining karibal nga si Floyd Mayweather Jr., kinsa   nagmalipayon karon sa iyang estado isip usa ka retirado.

Si Pacquiao mipalukapa ni Vargas sa ikaduhang hugna ug midominar sa nahabiling bahin sa 12 ka hugna nilang away dayon na ngadto sa pagkulit og impresibong kadaugan pinaagi sa unanimous decision aron maangkon og balik ang WBO welterweight title niadtong Domingo didto sa Thomas & Mack Center sa Las Vegas, Nevada.

Gawas nga nahimong three-time WBO welterweight title-holder, si Pacquiao mikulit sab og kasaysayan isip labing unang world boxing champion nga usa ka aktibong senador.

Taliwala sa bag-ong dungog nga nakab-ot ni Pacquiao, nahimong sumsoman ang wala pa matiwas nilang panagbangi ni Mayweather. Ang duha nag-abot sa makasaysayanong “Fight  of the Century” sa miaging tuig diin si Mayweather midaog pinaagi sa desisyon, apan naputos kini og kontrobersiya gumikan sa kakulang niini og aksiyon.

Si Mayweather nagpunay og dagan-dagan sama sa naandan niyang estilo, apan misamot ang kasagmuyo sa fans human mideklara si Pacquiao nga miaway siya bisan og dunay angol sa tuo niyang abaga.

Karon nga napamatud-an ni Pacquiao nga duna pa siya’y ikabuga ug makawadwad pa og usa  ka  dekalibreng away bisan  og   duna  na  siya’y  bag-ong tahas isip  Senador sa Pilipinas, miulbo dayon ang awhag sa kadaghanan nga gustong mag-abot og usab ibabaw sa ring ang duha sa labing banggiitan nga boksidor sa ilang henerasyon.

Gani dunay kahayag nga midan-ag sa maong posibilidad human si Mayweather nasigpatan sa ringside nga mitan-aw sa away ni Pacquiao ug Vargas.

Sa dihang gikuhaan sa iyang habig,  si Pacquiao nagkanayon nga wa’y problema kaniya nga makigharong og balik ni Mayweather kun ugaling mao kini ang gusto sa mga fans.

“Not only for myself, but the fans of boxing want the rematch then why not?” matud pa ni Pacquiao sa dihang nahinabi sa mga tigbalita sa iyang lawak didto sa Wynn Hotel and Casino.    Gani si Pacquiao mismo ang miingon nga dili na unya lisud ang pakigsabot-sabot ni Mayweather gumikan kay duna na sila’y direkta nga kontak sa kampo niini. “Because we now have direct contact to them it would be easier to talk about when there will be a rematch,” dugang pa sa eight-division world champion.

Hinuon, si Pacquiao mibutyag nga wala pa siya maghuna-huna kabahin sa sunod niyang away gumikan kay adto usa ibubo niya ang iyang atensiyon sa Senado, kansang session ablihan og balik sunod semana.  (BANAT NEWS)