Lamac mibira sa seniors-A title sa Consolacion caging
CEBU, Philippines - Si Joseph Cabahug mipabuto og 16 puntos, samtang sila si Mamil Larrobis ug Jacob Baguio mitampo og 14 puntos matag usa sa dihang gipayaka sa Lamac ang Poblacion Occidental, 69-64, aron pagsakmit sa kampiyonato sa inter-barangay seniors category A sa 6th Mayor Teresa P. Alegado Fiesta Basketball League didto sa Consolacion, Cebu.
Gumikan sa impresibo niyang average nga 26 puntos, 15 ka rebounds ug lima ka assists matag duwa, si Cabahug wala lang gibayaw isip Finals MVP gumikan kay iya sab nga gilangkat ang regular season MVP award.
Human misutoy ngadto sa sayong 17-6 nga labaw, ang Lamac diriyot mikolapso hinungdan nga nakasikit ang Poblacion Occidental sa halftime, 28-31.
Apan mi-arangkada na sab ang Lamac sa ikatulong kuwarter dayon na sa pag-inat og balik sa ilang labaw ngadto na sa usa ka dosenang puntos, 58-46. Wala na milingi pa sukad niadto ang Lamac.
Si Fritz Arreza maoy nangu sa Poblacion Occidental bitbit ang 19 puntos, samtang sila si Arturo Pepito ug Erwin Armean mihipos og 10 puntos matag usa alang sa pilderong kawsa.
Ang mga duwa ubos sa superbisyon ni commissioner Paul Alelu Q. Flores, kanhi batos sa FEU Tamaraws uban ni PBA superstar Arwind Santos nga nakampiyon sa UAAP Season 68 niadtong tuig 2008. Miabag kaniya si deputy commissioner Aurelio Eslawan ug technical commitee head Leking Caylan.
Ang overall committee chairman sa maong usa ka bulan nga kalihukan mao si Liga ng mga Barangay President Roy Linaboc. Nagsilbe niyang co-chairman mao sila si SB members Marilou P. Casul ug Benjamin "Boy" Tibon.
Gipahigayon aron pagdugang og lamas sa tinuig nga selebrasyon sa pista sa Consolacion agig pagyukbo sa minahal nilang patron nga si San Narciso karong Oktubre 29, nagmalampuson ang maong liga gumikan sa hugtanong suporta sa Consolacion LGU ubos sa pagpangu ni Mayor Teresa Alegado ug Vice Mayor Dr. Rey Damole uban nilang SB members JoyJoy Alegado, Nelia Ermac, Elenito Palang, Brando Cuizon, Victor Maglasang ug Alfie Ouano. EBV (BANAT NEWS)
- Latest
