Warriors miihaw sa Panthers

CEBU, Philippines – Ang University of San Carlos (USC) Warriors wa’y puangod nga miihaw sa University of Southern Philippines Foundation (USPF) Panthers, 91-73 sa 1st Capt. Raul Cabanero Inter-collegiate Basketball League niadtong Lunes sa gabii didto sa Bulacao Sports Complex sa dakbayan sa Talisay.

Sa pasiunang duwa, ang Upper Kabanayan naka-eskapo bitbit ang 83-80 nga kadaugan  batok sa Friendly Homes ubos sa Inter-sitio category.

Nagmangtas na sab si Charles Pepito, kinsa mikadlit og 17 puntos aron pangulohan ang Warriors nga nagbitbit og 2-2 nga baraha. Mipakita sab og maayong labok silang Caesar Ian Ortega, Ian Tagapan ug Christian Maconocido nga pareho sab miiskor og double figures alang sa Warriors nga nakapanemaho sa ilang sayong kadaugan human nila namintinar ang double digits nga labaw sa final period.

Si Lyndon Colina maoy nangu sa Panthers sa iyang 17 puntos, samtang duha niya ka teammates ang miiskor og 10 puntos matag usa.

Ang Panthers nagtangag og 1-1 nga baraha ning maong liga nga giorganisar ni Bulacao Brgy. Capt. ug Talisay City ABC president Raul Cabanero.

Gisuportahan sa Bulacao Barangay Council ug sa SK Task Force, ang mga duwa gipadagan nilang konsehal Banjo Abastillas, Darwin Cabanero ug Agnes Lastimosa ug ingon man sa CEBRA sa pagpangulo ni Edwin Dejacto Sr.

Puntos Matag Usa

Unang duwa:

Upper Kabanayan (83) – Gabato 21, B. Basillote 15, Castilotte 14, Abellana 11, Nahine 8, Labrador 5, A. Nahine 4, Basillote 3.

Friendly Homes (80) – Anciano 26,  Perez 22, Gabaca 20, Racaza 5, Escalante 2, Noynay 2, Cabanero 2, B. Anciano 2.

Ikaduhang duwa:

USC (91) – Pepito 17, Ortega 12, Tagapan 11, Maconocido 10, McAloney 9, Igna 8, Cataposan 5, Ting 5, Suarez 2, Gaviola 2.

USPF (73) – Colina 17, Flores 10, Batac 10, Ceniza 9, Langahin 6, Quiachon 5, Avancena 5, Sastrillas 5, Alocillo 2, Meca 2, Bolivar 2. (BANAT NEWS)