USC mipukan sa UC

CEBU, Philippines – Giluwas ni Charles Pepito  ang  University of  San Carlos (USC) Warriors    pinaagi sa iyang lay-up sa himalatyong segundos sa higpit kaayo nga duwa batok sa University of Cebu (UC) Webmasters, 77-76 sa 1st Capt. Raul Cabanero Inter-collegiate Basketball League niadtong Biyernes sa gabii didto sa Bulacao Sports Complex, Talisay City.

Gawas sa iyang mabayanihong duwa, si Pepito mao sab ang  topscorer   sa Warriors nga mipabuhagay og 24 puntos. Si  Ian Jefferson Tagapan nga maoy mipasa sa bola ngadto ni Pepito mitampo’g 16 puntos, samtang si William McAloney miabuno’g 12 puntos alang sa Warriors nga nidaog na sud sa tulo ka duwa.

Anaa na unta sa baba sa kadaugan ang Webmasters dihang abante sila’g uno punto, 76-75 human masud ang lay-up ni Filvenson Culango sa nahabiling singko segundos sa final period, apan  si Pepito  mibawos sab  pinaagi sa kaugalingon niyang lay-up  nga nakapadaog sa Warriors.

Si Culango miiskor og 10 puntos, apan si Delator maoy nangu sa UC sa iyang 21 puntos, gisundan ni Justine Dacalos nga adunay 14 puntos.

Sa laing duwa, ang Crossan yano kaayong midaog pinaagi sa paglubong sa Holy Child, 89-69 ubos sa Inter-sitio  division ning maong liga nga gisuportahan sa Bulacao Barangay Council ubos sa liderato ni Bulacao Brgy. Capt. ug Talisay City ABC president Raul Cabanero ug sa SK Task Force.

Ang mga duwa gipadagan nilang konsehal Banjo Abastillos, Darwin Cabanero ug Agnes Lastimosa inabagan sa Cebu Basketball Referee Association (CEBRA) sa pagpangulo ni Edwin Dejacto Sr.

Puntos Matag Usa

Unang duwa:

CROSSAN (89) – Marohom 17, Basillote 12, Comedia 12, Panugaling 12, Dela Peña 9, Abarquez 9, A. Abarquez 6, Canania 2, Alonzo 2, Bairoy 2, Bayking 2, Povadora 2.

HOLY CHILD (69) – Bacasmas 19, Lastimosa 17, Emperia 14, Pielago 12, Labra 4, Entienza 3.

Ikaduhang duwa:

USC (77) – Pepito 24, Tagapan 16, McAloney 12, Ortega 8, Laguyo 3, Ecarma 3, Catapusan 3, Rabat 2, Divinagracia 2, Suarez 2, Arjon 2.

UC (76) – Delator 21, Dacalos 14, Culango 10, Codilla 6, Puerto 6, Suelto 6, Jabello 6, Tagudin 4, Mayol 3. (BANAT NEWS)