UV milubong sa USC

CEBU, Philippines – Miiskor og makabungog nga kadaugan  ang  University of the Visayas (UV) Green Lancers  pinaagi sa paglubong sa University of San Carlos (USC) Warriors, 75-52 sa 1st Capt. Raul Cabanero Inter-collegiate basketball tournament niadtong Martes sa gabii didto sa Bulacao Sports Complex, Talisay City.

Gipangulohan ni Sheldon Gahi ang kadaugan nga mitikdol og 12 puntos, samtang sila si Jun Kent Manzo, Joshue Segumpan Jr. ug Michael Angelo Macion mitimbre’g 10 puntos matag usa alang  sa UV Lancers, kinsa mipahimulos sa ilang kahigayonan atol sa final period  human  na-fouled out silang Giovanni Laguyo, William McAloney ug Ian Jefferson Tagapan hinungdan sa pagkalubong sa USC Warriors.

Wala hinuon makaduwa ang ilang mga sentro nga silang Charles Pepito ug Dolan Adlawan.

Si McAloney mituhog og 12 puntos, samtang si  Caesar Ian Ortega mitikdol og 11 puntos aron maoy mangu sa USC Warriors nga wala pa’y daog sud sa duha ka duwa.

Sa  laing aksiyon, ang Villaberna midaog batok sa Upper Kabanayan, 54-52 ubos sa Inter-sitio division ning maong liga nga nahimo pinaagi sa paningkamot ni Bulacao Brgy. Capt. ug Talisay City ABC President  Raul Cabanero inabagan sa iyang mga konsehales nga sila si Banjo Abastillas,   Darwin Cabanero ug  Agnes Lastimosa.

Ang liga nga gidumala sa Cebu Basketball Referee Association sa pagpangulo ni CESAFI head referee Edwin Dejacto Sr., gisuportahan sab sa Bulacao Barangay Council ug sa SK Task Force.

Puntos Matag Usa

Unang duwa:

(Inter-sitio)

Villaberna (54) – Genin 15, Sabanal 14, Sembrino 12, Wong 7, Adolfo 4, Alvarez 2.

Upper Kabanayan (52) – Gabato 25, Ylanan 15, Llamedo 5, Delapiera 5, Belza 2.

Ikaduhang duwa:

(Inter-collegiate)

UV (75) – Gahi 12, Manzo 10, Segumpan 10,  Macion 10, Mendoza 8, Santillan 7, Napao 5, Saga 4, Aguirre 4, Bolanio 1.

USC (52) – McAlony 12, Ortega 11, Tagapan 6, Arjon 6, Gaviola 6, Divinagracia 3, Suarez 3, Laguyo 2, Ecatuma 2, Rabat 1. (BANAT NEWS)