USC mipukan sa UST, abante semis sa PCCL

CEBU, Philippines – Nagmangtas na sab  si Shooster Olago diin mihimo siya og laing double-double  alang sa University of San Carlos (USC) Warriors nga mipilde sa University of Sto. Tomas (UST) Growling Tigers aron moabante sa Final Four sa 2015 PCCL National Collegiate Championship kagahapon didto sa The Arena sa San Juan, Metro Manila.

Si Olago mipabuhagay og 20 puntos ug milangkat og 13 ka rebounds alang sa reigning Cebu Schools Athletic Foundation, Inc. (CESAFI) champion nga  kinahanglang modaog sa mosunod nga duha ka duwa aron masakmit ang P1 million nga ganti ug ingon man ilhon nga labing  maayo nga collegiate ballclub  sa nasud.

Dili hinuon sayon ang   misyon sa Warriors tungod kay sunod nilang sangkaon mao man ang UAAP champions Far Eastern University (FEU) Tamaraws nga mag-ilog sa luna sa finals karong hapon.

Ang Warriors ni interim coach Bong Abad yano kaayong mipapas sa ilang 11-18 nga alkanse sa sayong bahin sa duwa ug milusad og bangis nga pangataki sa third period aron ilogon ang labaw sa wala pa nila ihawa ang Tigers.

Gawas ni Olago, mipakita sab og maayong labok silang Ian Tagapan, Ian Ortega, Charles Pepito, Christ Maconido ug Gio Laguyo alang sa Warriors. (BANAT NEWS)