Monterroyo, 5-1 na’s Laba President’s Cup

CEBU, Philippines - Solidong depensa ang gipatuman sa team Monterroyo sa hinapos nga bahin sa fourth quarter maoy gihimo nilang taming aron makaikyas batok sa Avengers,  80-79 sa second conference sa LABA President’s Cup 2015 basketball tournament niadtong miaging Biyernes didto sa Banilad  Sports Center, dakbayan sa Mandaue.

Nagmangtas na sab si Tawing Grafe diin miburak kini og 25 puntos aron mangu sa ikalimang daog sa Monterroyo ni team owner Dr. Raul Monterroyo, kinsa nakatabang sab og daku sa depensa.

Si Monterroyo mihimo’g sayes puntos, upat ka block shots ug lima ka rebounds.

Misalida sab og maayo si Rex Gonzaga, kinsa mitali og 20 puntos ug ingon man si Albert Ramos nga miariya og 10 puntos alang sa Monterroyo nga misutoy human makatabla, 74-all aron moabante og sayes puntos, 80-74 human sa basket ni Gonzaga.

Si Merot Ygoña miduslit og 5-0 run aron makan-an ang labaw ngadto  sa usa ka palito sa himalatyong segundos, 79-80 nga nakapagilok sa duwa. Aduna unta’y chance nga makawat sa Avengers ang daog, apan si team owner Arnold Pestaño misipyat sa iyang lay-up dayong kapupos sa oras.

Si Pestaño maoy nangunay sa pagpangulo sa iyang koponan nga mikamada og 22 puntos, lakip ang walo ka sunod-sunod nga puntos sa first quarter, gisundan ni Ely Tantuan nga adunay 18 puntos, samtang si Ygoña  miabuno’g 17 puntos.

Ang Monterroyo nagbitbit na karon og 5-1 nga baraha, samtang ang Avengers adunay 1-5 record ning maong torneyo nga gipasiugdahan sa Los Amigos Basketball Association ubos sa liderato  sa ilang presidente nga si konsehal Gilbert Sebandal.

Ang  duwa gidumala ni league commissioner Geryl Bukiron inabagan nilang Lloyd Chavez, Ramil Baclay ug Allan Recla, ingon man nilang Chang Tejero, Norman Tisoy, Arjan Wenceslao ug  Kenneth Tagalog sa CEBRA.

PUNTOS MATAG USA

MONTERROYO (83) – Grafe 25, Gonzaga 20, Ramos 10, Lepon 6, Monterroyo 6, Baunsit 6, Pestaño 2, Hatamosa 2, Cabucos 2, Paciencia 1.

AVENGERS (79) – Pestaño 22, Tantuan 18, Ygoña 17, Cuizon 8, Catinoy 7, Auman 4, Tupas 2.