CIS kampiyon sa SCEGames 2015 basketball event

CEBU, Philippines – Kasingkasing, determinasyon ug teamwork maoy gihimong hinagiban sa Cebu International School (CIS) pagbuntog sa Aboitiz Construction Group, Inc. (ACGI)-Metaphil, 41-37 sa finals ug ingon man paglangkat sa titulo sa SCEGA Cooperative basketball tournament 2015 niadtong Oktubre 11 didto sa San Roque Parish gym sa Barangay Subangdaku, Mandaue City.

Ang CIS ni playing coach Lando Mondarte nagkapuliki og gukod gikan gyud sa pagsugod sa duwa. Gani gilubong sila og 17 puntos, 11-28 sa halftime nga maoy labing daku nga labaw nga natala sa ACGI-Metaphil.

Bisan pa sa maong labaw, wala maluya ang CIS, inay nakadugang hinuon kini sa ilang kadasig sa pakigbisog aron makab-ot ang giambisyon nila nga korona.

Walay bisan usa sa mga magduduwa sa CIS ang miiskor og double figures, apan ang tanan nilang players pulos nakapuntos nga maoy sukli sa ilang paningkamot.

Sila si Edgar Aligway,  Kerry Quitay ug John Gener Quintayo maoy nahimong bida sa CIS dihang mikumbati sila’g maayo sa tunga-tungang bahin sa fourth quarter aron papason ang dakung labaw  sa ACGI-Metaphil.

Ang CIS milabaw sa labing unang higayon sa iskor nga 35-34 sa basket ni Quintayo sa nahabiling 3:26 sa final period. Nangahas  unta ang ACGI-Metaphil pag-ilog sa labaw, apan gibaraw kini sa CIS.

Ang kadaugan miisip nga panimalos sa CIS ngadto sa ACGI-Metaphil, kinsa gilubong ug nakabangon sa hinapos nga bahin sa fourth quarter atol sa elimination round.

Si Herbert Enclonar maoy topscorer sa ACGI-Metaphil pinaagi sa iyang 10 puntos.

Ang torneyo nga tipik sa kalihukan sa pagsaulog sa  34th Founding Anniversary sa SCEGA Cooperative gidumala ni league commissioner Orlando Mondarte inabagan ni vice chair Aldrin Gabutan.

Nagmalampuson sab ang liga tungod sa suporta sa ilang chairman nga si Zenaida Novabos,  marketing officer Jingjing Ermac, manager Judith Salceda ug sa tanang sakop sa SCEGA Cooperative.

Puntos Matag Usa

CIS (41) – Aligway 7, Quintayo 5, K. Quitay 5, O. Mondarte 4,F. Mondarte 4, Padimdim 3, A. Catalan 2, Dolera 2, Oberes 2, Salvador 2, Ermac 2, J. Catalan 1, T. Quitay 1, Rondina 1.

ACGI-METAPHL (37) – Enclonar 10, Pulvera 8, Malicay 5, Pesquera 4, Rayl 4, Abucay 2, Manatad 2, Arioja 2, Pepito 2. (BANAT NEWS)