Tres ni Lesin mipadaog sa Lesjorcinran
CEBU, Philippines - Ang 3-point shot ni Gilbert Lesin sa nahabiling nuybe segundos sa fourth quarter maoy mitugpo sa Lesjorcinran ngadto sa kadaugan batok sa Avengers, 86-83 sa 2nd Conference sa LABA President’s Cup 2015 basketball tournament niadtong Lunes didto sa Banilad Sports Center.
Si Lesin mirehistro og 15 puntos, apan si Barak Recto maoy nangu sa opensa sa Lesjorcinran sa iyang 25 puntos. Laing duha niya ka teammates ang mihimo sab og double figures diin si Celso Evangelista mipugnit og 12 puntos, samtang si Richard Jordan mitimang og 11 puntos. Nangatol sab ang mga kamot ni Richard Limosnero, kinsa miamot og otso puntos.
Ang Avengers, kansang 83 puntos nalansang, gipangulohan ni Arnold Pestaño nga mipabuhagay og 25 puntos lakip ang tulo ka triples, gisundan ni Ely Tantuan sa iyang 13 puntos ug Manuel Cuizon nga adunay 10 puntos.
- Latest
