SCEGames finals, Family Day himuon karon

CEBU, Philippines – Saulogon na karong adlawa, Oktubre 11 ang labing daku nga kalihukan sa SCEGA Cooperative agi’g pagtimaan sa ilang ika-34 nga Founding Anniversary diha sa San Roque Parish gym sa Barangay Subangdaku, Mandaue City.

Usa sa mga highlights sa maong selebrasyon mao ang SCEGA basketball championship game ug ang Family Day sa SCEGAns.

Magsangka sa kampiyonato mao ang ACGI-Metaphil ug ang Cebu International School (CIS) sa alas-9:30 sa buntag human sa engkuwentro tali sa AboitizLand ug Linde/SIG nga magtigi alang sa ikatulong puwesto.

Ang championship game pagadumalaon ni league commissioner Lando Mondarte inabagan sa ilang vice chairman nga si Aldrin Gabutan.

Sa dili pa, usa ka Santos nga Misa ang ipahigayon diha sa San Roque Parish Church sa alas-6:30 sa buntag. Isunod dayon ang programa diin ipaila ang mga company affiliates ug delegates, SCEGA incumbent officers ug SCEGA staff ug ang mensahe gikan sa ilang chairman nga si Zenaida Novabos.

Gawas pa niini, ang mga miyembro sa SCEGA may kahigayonan sab nga modaog og mga ganti  atol sa raffle draws, aduna sa’y demo sa soap making ug dish washing liquid making ug Pinoy games. (BANAT NEWS)