Cebu mo-host sa Mr. and Ms. Universe bodybuilding championships

CEBU, Philippines – Manganhi sa Sugbo  ang mga tadhan nga bodybuilders gikan sa 17 ka nasud sa tibuok kalibotan   alang sa Mr. and Ms. Universe bodybuilding championships nga gikatakda karong Nobiyembre 13-15 diha sa Mariner’s Court.

Si Dennis Delgado sa Workout Fitness Center nagkanayon nga sa dili pa ang makasaysayanong event sa Philippine sports nga anhi dinhi mahitabo, adunay qualifying tournament nga pagahimuon nga ulohan og “Mr. and Ms. Phil-Asia International Bodybuilding Championships” sa Nobiyembre 11-12 sa susama gihapon nga binyu.

Ang nag-unang tulo ka mananaog matag kategoriya makaangkon og katungod nga morepresentar sa nasud sa maong prestihiyosong kompetisyon nga salmotan og gatosan ka mga atleta gikan sa unom ka mga kontinente.

Lakip sa mga notadong entrante nga sayong nagparehistro mao sila si Ana Noble, Peter Muzariri ug Sarah Malthus sa New Zealand ug Bruno Starrs sa Australia. Lain pang mga nasud nga adunay representante mao ang France, United Arab Emirates, India, Morocco, Malaysia, Kuwait, Sri Lanka, Holland, Tonga, South Africa, Samoa, Zimbabwe, Brunei, England, ug United States.

Si National Amateur Body Builders' Association (NABBA) International, Inc. Secretary-General Jim Pitt sa sayo pa mikompirmar nga ang Sugbo maoy mo-host sa maong daku nga kalihukan sa bodybuilding gumikan sa malampuson niining pagpadagan sa Phil-Asia Championships sa miaging tuig.

“Considering the more than two decades of experience of  Mr. Delgado in organizing national and international bodybuilding championships, we have complete trust in his capability to ensure the grand success of the NABBA International 2015 Universe Championships, the first ever Universe Championship to be held in the Philippines,” matud pa ni Pitt sa sulat niini ngadtong Delgado ug NABBA Philippines President Juanto ‘Jun’ Tayag.

Labing sikat nga produkto sa maong tinuig nga kompetisyon mao ang Hollywood actor ug tinamod nga politiko nga si Arnold Schwarzenegger.

Alang sa dugang mga detalye, mahimong motawag sa Workout Fitness Center sa 345-2395 o 255-5531. (BANAT NEWS)