Becchi mipalagpot sa Magone, Chavez midaog sa Vicuña

CEBU, Philippines - Mipatuasik og 17 puntos si Kenneth Rey Marilao alang sa Team Becchi Village nga mipalagpot sa Team Blessed Michelle Magone, 67-52 sa Don Bosco@200 Alumni Basketball Tournament niadtong Domingo didto sa Don Bosco Technology Center (DBTC) Arena sa Punta Princesa, siyudad sa Sugbo.

Si Marilao maoy nangu sa scoring sa Becchi sa second quarter nga miposa’g nuybe sa iyang 17 puntos aron moposte’g 18 puntos nga bentaha sa halftime, 41-23.

Sila si Neil Frederick Selerio ug Ryan Alforque nga maoy mga pabilo sa mainitong rally gikan sa pagsugod nagkumboya’g 14 puntos, samtang si Archimedes Reroma miduslit og siyete puntos sa tibuok first half.

Si Daryl Diamante mikulit og 10 puntos sa third period alang sa koponan nga  ginganlan sa umahan diin si Don Bosco nahimugso niadtong 1815, aron mainat ang labaw sa Becchi ngadto sa 20 puntos, 58-38.

Gisuwayan unta pagluwas ni Ron Mabanto ang Magone pinaagi sa pagpabuto og tulo ka triples sa iyang 21 puntos sa second half, apan wala siya makakuha og igong suporta gikan sa iyang kaubanan nga mihikaw sa kahigayonan nila nga moduwa sa playoffs.

Sa sayo pa, si Francis Lim nagmangtas sa tibuok duwa diin mipabuhagay siya og 36 puntos alang sa Team Rector Major Pascual Chavez nga mipukan sa Blessed Laura Vicuña, 87-80.

Ang daog mopahimutang unta sa Team Chavez alang sa kahigayonan sa playoffs, bisan mitapos sila bitbit ang 2-2 nga baraha, apan ang Team Blessed Miguel Rua nakaangkon og putling 4-0  record sa sayon nga kadaugan batok sa DBTC Greywolves. 

Si Anjerico Abellanosa miposa’g 21 puntos, samtang si Franz dela Torre miabuno’g 17 puntos alang sa Team Chavez.

Sila si Giovanni Canceko ug Quicy ‘Jones’ Adriano mipabuhagay og 27 ug 25 puntos alang sa Vicuña.

Ang pagkawala ni Arvin ‘Niño Bieber Branzuela sa depensa sa nahabiling 1:20 sa final period, nakapalisud sa Vicuña bisan pa og si Jojo Quilope mihimo’g 16 puntos, katunga niini iyang nahimo sa first quarter.