Binakbakay sa Punta Princesa karong gabii

CEBU, Philippines - Ang Sugbuanong boksidor nga si Canoy J. Singwangcha (9-1-1, 3KOs) makigharong na ni Rodel Tejares sa Malaybalay City, Bukidnon alang sa interim Asian Boxing Federation minimumweight title sa main event sa ‘Binakbakay sa Punta Princesa’ karong gabii diha sa Atillo Gym sa Barangay Punta Princesa, dakbayan sa Sugbo.

Si Canoy Singwangcha orihinal unta na makigsangka ni Jerry Tomogdan sa usa ka dumot nga ‘rematch’ apan ang naulahi dili madayon og away human kini gi-dengue, matud pa ni matchmaker Willie Flores.  Si Tomogdan gitambagan sa mga doktor nga mopahuway una og duha ka bulan sa dili pa kini paawayon og balik.

 Batok ni Tejares, ang 22-anyos nga si Canoy Singwangcha mowadwad gihapon og maayo sa iyang abilidad kay gikinahanglan man siya nga mokulit og daog aron hingpit nga maselyado ang gitinguha niyang ‘rematch’ batok ni Tomogdan, nga maoy mipatilaw sa labing una   pilde sa iyang karera pinaagi sa majority decision niadtong Enero 12 didto sa Barangay Tablon Gymnasium sa Cagayan de Oro City. 

Kini gumikan kay ang modaog sa away nilang Canoy ug Tejares obligado man nga modepensa sa iyang ABF title batok ni Tomogdan kun mabalik na ang kahimsog sa panglawas niini.

 Sa suporting main event sa maong kulbahinam nga bininukbukay nga gipasiugdahan ni Thai boxing patron Naris Singwangcha ug sa Cebuano topnotch promoter nga si Rex ‘Wakee’ Salud, ang wala pa’y pildeng lightweight contender nga si Ardie Boyose Singwangcha (15-0-2,11KOs) makigpinaksitay ni Phil Angcamor (13-23-3,7KOs) sa Bukidnon.

   Ang nahibilin nga away sa maong fightcard nga gipaluyohan sab sa Punta Princesa Barangay Council ubos sa liderato ni Brgy. Capt. Jose F. Navarro naglangkob nilang Joaquino E. Singwangcha batok Charlie Cabilla,  Dignos M. Singwangcha batok Ponciano Rimandiman ug Junriel Jimenes batok Roga Libres.  (BANAT NEWS)