Nietes midawat na sa RING title
CEBU, Philippines - Parañaque City – Maghabak na og duha ka bakus si WBO light flyweight champion Donnie ‘Ahas’ Nietes human niya nadawat ang iyang RING title atol sa press conference sa umaabot niyang away batok ni Gilberto Parra sa main event sa”Pinoy Pride 30: D-Day” karong Sabado didto sa Smart Araneta Coliseum.
Ang RING title gihatag sa Ring Magazine ngadto sa mga lineal world champions sa tanan weight class. Ang Ring Magazine maoy giilang bibliya sa boksing. Si Anson Wainwright sa RING Magazine maoy mihatag sa RING title ngadto ni Nietes.
Ang two-division world champion Nietes nga lumad taga-Murcia, Negros Occidental, midaog sa Ring title human midaog pinaagi sa ninth round technical knockout batok ni former Mexican champion Moises Fuentes niadtong Mayo 10 sa miaging tuig didto sa SM Mall of Asia Arena.
Sa maong kalampusan si Nietes nahimong labing unang Pinoy nga misakmit sa RING title sukad ni Sonny Boy Jaro, kinsa miangkon sa RING flyweight title gikan ni Thai legend Pongsaklek Wonjongkam niadtong 2012. Dugang kini nga dungog ni Nietes, ang giila karon nga labing dugay nga reigning world champion sa Pilipinas human niya mabuak ang rekord ni Gabriel ‘Flash’ Elorde. (BANAT PALARO)
- Latest
