Bulls naligsan sa Pistons

CEBU, Philippines – Mibahug og 22 puntos si Reggie Jackson, ang 17 niini didto sa third quarter aron tabangan ang Detroit Pistons nga mosumbalik gikan sa 19 puntos nga biya ug modaug og 16 puntos batok sa Chicago Bulls sa iskor, 107-91 kagahapon didto sa The Palace  sa Auburn Hills, Michigan.

Naglabaw ang Pistons sa iskor, 80-79 pagsugod sa fourth quarter apan nabiyaan una sila'g 19 puntos, 53-72 may siete minutos ang nahibilin sa third quarter. Nagsugod sila'g apas dihang nagkumboya og 27 puntos ug 13 ka rebounds silang Jackson ug ang laing point guard nga si Spencer Dinwiddie didto sa second half.

Hinoon, si Tayshaun Prince maoy midominar sa Pistons kalabot sa depensa diin nakahimo siya'g duha ka steals ug milangkat sab og siyam ka rebounds.

Mao kadto'y naghatag kang Dinwiddie og higayon nga makatabang sa opensa dihang miiskor siya'g otso puntos lakip ang tulo ka assists sa ilang mainitong 17-0 run nga naghatag sa Pistons og 100-83 nga abante may tres minutos ang nahibiling oras sa duwa.

Ila sab na-outscore ang Bulls, 47-11 sulod  sa 16 minutos sa mosunod nga duha ka quarters.

Si Pau Gasol maoy nangu sa Bulls sa iyang 27 puntos uban sa 10 ka rebounds ug midugang si Aaron Brooks og 19 puntos.

Ang pagkakuwang og players sa Pistons wala mahimong babag aron ilang maligsan ang Bulls. Wala makaduwa alang sa Pistons silang Greg Monroe ug Shawne Williams.

Human molabaw ang Pistons sa first quarter, 30-20 mibawos og 26-6 run ang Bulls alang sa 36-14 nga labaw aron moposte'g 56-44 bentaha sa halftime.

Daling nausab ang dagan sa duwa didto sa third quarter dihang napugos nilang Gasol, Joakim Noah ug Mike Dunleavy silang Andre Drummong ug Anthony Tolliver ngadto sa foul trouble aron hulbotan ni coach Stan Van Gundy ang mas mugbo niyang players.

Mihimo nang daan og 11 puntos si Gasol sa unang singko minutos sa third aron tabangan ang Bulls nga molabaw og 19 puntos, 72-53.

Apan dihang gidominar na sa guards sa Pistons ang duwa, daw sab nalipong ang Bulls.

Sa laing duwa, gipakuratan sa Phoenix ang Houston, 117-102, midaog ang Memphis batok sa Portland, 97-86 midaog ang Brooklyn batok sa Indiana ug midaog ang Golden State batok sa Utah, 106-91. (GGM gikan sa NBA.com)