Kimwa kampiyon sa PDBC Christmas League 2014
CEBU, Philippines – Ang Kimwa squad milusad og bangis nga opensa uban ang solidong depensa sa hinapos nga bahin sa fourth quarter batok sa team PDBC aron modaog, 74-63 sa taktakay nga finals ug aron sab masakmit ang kampiyonato sa Power Dealer Basketball Club Christmas League 2014 niadtong Miyerkules didto sa Kimwa gym sa Brgy. Subangdaku, Mandaue City.
Ang troika nilang Sheldon Gahi, Junjun Cañete ug Michael Baring maoy daku’g natampo sa kadaugan nga parehong miiskor og double figures. Si Gahi maoy topscorer nga mibuhos 23 puntos, gisundan ni Cañete sa iyang 19 puntos ug Baring nga adunay 15 puntos.
Pirmeng naggukod ang Kimwa ug nabiyaan sila og singko puntos, 47-52 sa third period sa duha ka free throws ni Canjo Echavez. Miburot pa ang labaw ngadto sa 57-49 sa nahabiling 7:33 sa fourth quarter, apan naabtan sa demalas ang PDBC ilabi na gikan sa free throw line nga naghatag sa Kimwa og higayon nga makatabla, 59-all human sa tres ni Weldy Soco sa katapusang 3:12 sa duwa. Sukad niadto naguba ang duwa sa PDBC ug nakahimo kini’g duha ka sunod-sunod nga turnovers hinungdan nga nakawat sa Kimwa ang daog.
Si Canjo lang ang bugtong player sa PDBC ang miiskor og double figures pinaagi sa iyang 19 puntos. Ang playermaker nga si Arnold de Asis, kinsa mao kanunay ang topscorer sa PDBC gilimitahan lang ngadto sa sayes puntos.
Ang liga nahimong malampuson tungod sa suporta sa Saymer Merchandise ni PDBC president Florentino Sayson. Ang mga duwa gidumala ni PDBC organizer Alner Mercado ug PDBC founder Arnold de Asis inabagan nilang Eduard Escorial, Marlon Espante ug Kenneth Tagalog sa VIMBRA.
Puntos Matag Usa
KIMWA (74) – Gahi 23, Cañete 19, Baring 15, Villarante 7, W. Soco 7, Miao 5, Tabura 3, Guilleran 2, M. Soco 2, Badano 2, Camasora 1.
PDBC (63) – Canjo 19, Langres 9, De Asis 6, Sayson 5, Povadora 4, Maboles 4, Alarde 3, Alquilita 3, Matthew 3, Romares 3, Comeros 2, Skye 2. (BANAT NEWS)
- Latest
