Korona langkaton na sa Beermen?
CEBU, Philippines – Dili na motugot pa ang San Miguel Beermen nga modaog ang Alaska Aces sa Game-6 sa ilang “best-of-seven” final series sa PBA Philippine Cup karong gabii didto sa Smart Araneta Coliseum.
Ang San Miguel nakabentaha sa series, 3-2 ug suwayan nila ang pagsakmit sa titulo sa duwa nila karon nga sugdan sa alas-7:30 sa gabii.
Nailog sa Beermen ang bentaha human sa ilang 93-88 nga kadaugan sa Game-5 ug usa ka daog na lang ang kinahanglan aron makuha nila pagbalik ang All-Filipino Cup title nga katapusan nilang naangkon niadtong tuig 2001.
Matud pa ni San Miguel coach Leo Austria nga ang ilang lig-on nga depensa nakatampo sa ilang kadaugan sa Game-5 ug naglaum siya nga mapakita gihapon kini sa iyang batos.
Itugyan gihapon ni Austria ang iyang pagsalig ngadto sa MVP tandem nga silang Junemar Fajardo ug Arwind Santos nga moalkontra sa nga bigmen sa Alaska.
Sa ilang bahin, si Aces coach Alex Compton wala pa mahubsi’g paglaum nga mokampiyon ug ibubo nila ang tanan aron mapugos ang serye sa Game-7. (BANAT NEWS)
- Latest
