Ken Caniga paglaum sa Sugbo
CEBU, Philippines – Linghod pa ang iyang pangedaron, apan si Ken ‘Shaolin’ Caniga, 10-anyos, maisip na nga usa sa mga labing masaarong mixed martial arts prospect sa Sugbo.
Gihingpit ni Caniga ang maong pangangkon human sa iyang malampusong kampanya sa miaging Batang Pinoy National Finals didto sa Bacolod diin siya mikabkab og duha ka bulawang medalya sa Muay Thai event.
Ang duha ka bulawang medalya ni Caniga usa sa nakatabang sa kalampusan sa Team Cebu City nga miangkon sa overall title sa Batang Pinoy Finals niadtong Disyembre 14. “Wa man ko kulbai sa ako mga duwa tungod kay sakto man ko sa practice,” matud pa ni Caniga. “Mas sayon na lang sa nationals kay mas grabe man ako practice human didto sa Aklan.”
Nahimong mabungahon ang tuig alang ni Caniga, kinsa midaog usab sa labing una niyang MMA debut niadtong Agosto dihang gipaundang niya sa first round si Benedict Torbiso atol sa Cebu Extreme Fight League diha sa Cebu Coliseum.
“Happy man ko nga magsige og training og martial arts pero pareha ra sad ko sa uban bata nga magduwa ug moadto sa school,” dugang pa niya.
Sa iyang bahin, ang uyoan ni Ken nga si Yaw-Yan ArDigma Cebu Martial Arts Inc. CEO and Founder Master Benigno ‘Ekin’ Caniga Jr. nagtuo nga daku ang potensyal sa iyang pag-umangkon nga molampos paghatod og gold medal alang sa nasud sa Asian Games ugma damlag.
“Actually I have received offer to include Ken in the Philippine Youth Team that would compete in the World Youth Muay Thai tournament in Thailand next year, but I pass because I want to give the kid more experience,” matud pa ni Master Ekin.
Sa iyang bahin si Cebu City Sports Commission (CCSC) chairman Edward Hayco midayeg sa abilidad ni Caniga, kinsa iyang gikuha nga usa ka junior trainer sa grassroots program sa CCSC nga ‘Bakbakan sa Sugbu’. (BANAT NEWS)
- Latest
