Cavaliers gilubong sa Pistons

CEBU, Philippines – Gipakita sa Detroit Pistons nga makahimo gihapon sila bisan wala na kanila ang ilang beteranong forward nga si Josh Smith dihang ilang gilubong ang Cleveland Cavaliers, 103-80 sa nagpadayong duwa sa National Basketball Association kagahapon didto sa Quicken Loans Arena sa Cleveland, Ohio.

Ikaduha na kining higayon sud lang sa duha ka semana nga ang Cavaliers gilubong og maayo sa ilang kaugalingon balwarte human sab sila gipanitan sa Atlanta Hawks, 98-127  niadtong Disyembre 17. Ang Pistons, kinsa mihimo’g 18-0 run sa fourth period gipangulohan ni Brandon Jenning  pinaagi sa iyang  25 puntos.

 “We’re not a very good team, as far as on the court, where we’re still trying to find our way,” matud pa ni LeBron James, kinsa miiskor og 17 puntos uban sa 10 ka rebounds ug pito ka assists alang sa Cavs.  “Right now we’re just not very good in every aspect of the game that we need to be to compete every night,” dugang pa niya.

Si Andre Drummond miamot og 16 puntos ug 17 ka rebounds alang sa Pistons, kinsa aduna na’y 7-23 nga baraha. Sa maong duwa, ang Pistons mihimo’g franchise record nga mipasulod og  17  sa ilang 31 ka tiras gikan sa three-point area. Si Kevin Love miiskor og 20 puntos ug adunay 10 ka rebounds, samtang si Tristan Thompson mihimo sab og double-double figures alang sa Cavs pinaagi sa iyang 18 puntos ug 11 ka rebounds. Sa ikaduhang higayon, si Kyrie Irving wala gihapon makaduwa alang sa Cavs tungod sa bun-og sa iyang wa’ng tuhod. Wala sab makaduwa  ang ilang starting center nga si Anderson Varejao kay bag-o lang kini gioperahan human makaangkon og ACL. Sa lain pang mga duwa,  ang San Antonio Spurs  midaog batok sa Houston Rockets, 110-106, midaog sab ang Dallas Mavericks batok sa Oklahoma City Thunder, 112-107. Gilubong sa Toronto Raptors ang Denver Nuggets sa iskor nga 116-102, samtang gilubong sab sa Portland  TrailBlazers ang New York Knicks, 101-79 ug  ang Phoenix Suns mipakaging sa Los  Angeles Lakers. (BANAT NEWS)