Arcilla at Dandan umabante sa 2nd round sa doubles ng PCA Open
MANILA, Philippines – Walang pagod na umabante sa second round sina No. 3 Johnny Arcilla at Kyle Joshua Dandan matapos gibain sina Joshua Miranda at Dennis Vitaliano, 6-0, 6-0, sa men’s doubles sa 33rd Philippine Columbian Association (PCA) Open na inihandog ng Cebuana Lhuillier at Metro Global Holdings kahapon sa PCA indoor shell clay courts sa Paco, Manila.
Sinabi ng 34-anyos na si Arcilla na gusto agad nilang tapusin ang laro para makaipon ng lakas sa pagsalang sa second round.
Makakatapat nina Arcilla at Dandan sa second round sina Leo Toledo at Bernan Bering, nanalo via walkover kina Rodolfo Barquin at Joshua Kinaadman.
Sa iba pang laro, tinakasan nina Jomar Arcilla at Roel Capangpangan sina John Jeric Accion at Andrew Tangalin, 3-6, 6-1, 6-2, habang iginupo nina John Altiche at Jason Benitez sina Israel Abarquez at Russel Arcilla Jr., 7-6 (1), 6-4, sa torneong suportado ng Hon. Emmanuel “Manny” Pacquiao, Dunlop, Fujidenzo/Whirlpool, Babolat, Head, Accel, Malate Bayview Mansion, Coca-Cola Bottlers Phils. Inc., Philippine Prudential Life Insurance Company Inc. at Seno Hardware.
Umiskor din ng panalo sina Roderick Agna at Danilo Olosin, Akio Sy at Ernesto Pantua, Hakeem Cariga at Francisco Santos at sina Jun Alcoseba at Arc Dolorito.
Dinaig nina Agna at Olosin sina Bernlo Bering at Randy Delavin, 6-3, 6-2; pinadapa nina Sy at Pantua sina Jhun Llira at Aeron Empleo, 6-3, 6-0; tinalo nina Cariga at Santos sina Paulo Baran at Carlos Rosales, 6-2, 6-2; at pinatumba nina Alcoseba at Dolorito sina Jordan Villanueva at Martin de Castro, 6-3, 6-4.
Umabante rin sina defending champions Patrick John Tierro at Ronard Joven, No. 2 Elbert Anasta at Mark Alcoseba, No. 3 Marc Reyes at Jed Olivarez, No. 5 Arvin Ruel at Rolando Ruel Jr., Expedito Lim Jr. at Dennis Santa Cruz, Kim Polero at Jedree Tan, at Ervin Concepcion at Elijah Arevalo via walkover.
Magpapatuloy ang aksiyon ngayong araw sa men’s singles.
- Latest
