Carcar Mayor’s Cup sugdan sa biyernes

CEBU, Philippines – Upat ka commercial teams ang  moduwa sa  open division sa  Mayor Nice Apura Cup  2014 basketball tournament nga  sugdan  sa  Nobiyembre 7 didto sa Carcar City Sports Complex.

Ang mga partisipanteng koponan mao ang ASPA, Abrenica Engineering, Jomangs Surplus ug Cebuana Lhuillier.

Ang mga organizers nga gipangulohan  nilang Julie Flores ug city councilor  Anthony John Apura pormal nga milusad sa ilang kalihukan kagahapon didto sa Sunburst Restaurant-One Mango branch.

Si Flores, kinsa mao  sab ang tournament director, nagkanayon nga buot niyang    dad-on sa  Carcar ang usa ka competitive nga matang sa basketbol ug iyang gi-awhag ang mga partisipanteng teams  sa pagpaduwa  sa  labing maayo nilang mga players.

Sa iyang bahin, si Apura, anak ni Mayor Nice Apura, kinsa mao sab ang sports commission chairman sa maong dakbayan, naglaum nga ang lima ka adlaw nga torneyo makadasig sa ilang local players aron molambo ang ilang duwa.

Ang upat ka koponan mopailawom og single round robin format diin ang top two qualifiers magsangka alang sa tagakay nga kampiyonato.

Ang kampiyon mobulsa og P50,000, ang second placer makadawat og P30,000, samtang ang third makaangkon og P20,000. Ang fourth player makadawat og consolation prize nga P10,000, apan ubos sa kondisyon nga wala sila ma-forfeit sa ilang duwa.

Gawas sa open division, ang laing mga kategoriya nga tigian naglakip sa Sangguniang Kabataan, Inter-Barangay, 21-under ug 21-above.

Matag tuig ang Carcar mopasiugda og mga  kalihukan sa paugnat sa kusog  nga kabahin sab sa kalihukan sa nagsingabot nilang kapistahan sa Nobiyembre 23-24.             Matud ni  Flores, gawas sa basketball, mopahigayon sab sila og  kompetisyon sa volleyball,  tennis ug motocross.

Usa sa labing gipaabot nga highlights nga kalingawan mao ang exhibition game tali sa University of the Visayas (UV) Green Lancers  batok sa  kanhi PBA stars  sa Nobiyembre 13 .

Ang duwa tali sa Jomangs batok sa ASPA maoy mobukas sa torneyo,  sundan kini sa duwa tali sa Cebuana Lhuillier ug Abrenica Engineering. (BANAT NEWS)