Huskies temporaryong nagsolo sa liderato sa LABA Commissioner’s Cup 2014

CEBU, Philippines – Miarangkada na sab ang Huskies ug gilubong nila ang Romgen, 116-103 aron magpabiling walay pilde sa  Los Amigos Basketball Association (LABA) Commissioner’s Cup 2014 sa miaging gabii didto sa  Banilad Sports Complex sa barangay Banilad, dakbayan sa Mandaue.

Sa gilauman, si Richard Madrid mao gihapon ang topscorer sa Huskies nga maoy midiktar sa kinatibuk-ang duwa. Si Madrid mikamada’g 27 puntos, sila si Richard Bathon ug Eugene Povadora mikabya og 19 puntos matag usa alang sa Huskies ni team owner Dr. Raul Monteroyo.

Ang Huskies pabiling nag-una sa standing bitbit ang 3-0 nga baraha.

Mirehistro unta si Banjo Hatamosa og game high 34 puntos, apan nakawang lang ang iyang mga paningkamot kay wala kabarog ang Romgen sa dakung hagit batok sa mangtas nga Huskies.

Sa laing aksiyon, ang MCC Larobis miiskor sab og daog pinaagi sa paglubong sa Falcon, 105-89.

Gipangulohan gihapon ni  Canjo Echavez ang kadaugan nga mipabuhagay og 27 puntos. Ang katimbang ni Echavez nga si Lloyd Chavez mitira og 22 puntos alang sa MCC Larobis ni team owner Bax Larobis

Didto gihapon sa third quarter nagmangtas si Echavez diin siya ang mikati sa 11 ka sunod-sunod nga puntos alang sa 71-59 nga bentaha. Miburot ang labaw ngadto sa 20 puntos, 80-70 sa sayong bahin sa final period, apan bisan pa niini, ang Larobis wala gyud mokompiyansa aron pagseguro nga maila ang daog.

Sila si Arnold ug Marcial Marturillas nagkumboya’g 36 puntos aron pangulohan ang napildeng Falcon nga nakatilaw sa ilang ikaduhang sunod-sunod nga pilde ning tinuig nga torneyo nga gipasiugdahan sa LABA ubos sa  ilang presidente nga si Christopher ‘Cris’ Ubas.

Gipaluyohan sab kini sa Banilad Barangay Council ubos sa liderato ni  Brgy. Capt. Greg Yap.

Ang mga duwa gidumala ni LABA vice president for external ug Banilad barangay councilor Gilbert  Sebandal uban ni Ruben Canen. (BANAT NEWS)