Orange nakamansa sa Maroon
CEBU, Philippines- Pakyas ang Maroon team pagpanalipod sa ilang limpyong rekord dihang gikuso-kuso sila sa mas gikaintapan nga Orange team, 79-74 sa SRP Sunday Club 6th Founding Anniversary League niadtong Domingo diha sa San Roque Parish gym sa Brgy. Subangdaku, Mandaue City.
Dili ikatingala nga sila gihapon si Glen ‘Dodod’ Colina ug Gideon Ipili ang nangulo sa Orange nga parehong mipupo’g 19 puntos.
Misuporta sab sila si Ohing Ortiz ug Ritchie Tecson nga nagkumboya’g 23 puntos alang sa Orange nga mipasilong na sa crossover semifinals.
Naglabaw ang Maroon-JIB Autoparts sa sayong bahin sa duwa, apan ang mas organisado nga Orange daling miilog sa tiyempo sa giya sa ilang playmaker nga si Tecson ug sa sentro niining si Ortiz nga alisto kaayong molawog nilang Colina ug Ipili.
Gidebuynas sab si Tata Perolino, kinsa walay sipyat sa tulo niya ka field goals ug duha ka free throws alang sa kinatibuk-an niyang otso puntos.
Mihulga ang Maroon-JIB Autoparts, apan wala sila molampos bisan sa ilang grabeng mga paningkamot.
Ang Maroon-JIB Autoparts ni team owner Alex Tecson gipangulohan ni Benito Aton Jr., kinsa miratsada’g 15 puntos, gisundan ni Fernando Anghay sa iyang 12 puntos ug Joel Aniñon nga adunay 11 puntos.
Sa laing bahin, wala na tiwasa ang aksiyon tali sa Gray ug Red human magtabla, 59-all pagtapos sa regulasyon.
Si SRP Sunday Club presidente Rom Castañeda nakahukom nga dili na kinahanglan ang overtime tungod kay gawas nga apeki sa oras, non-bearing usab ang duwa. Ang Gray hingpit nang natagak, samtang ang Red abante na sa semis.
Gipangulohan gihapon ni Marcial Marturillas ang Gray pinaagi sa iyang 23 puntos. Si Romy Castardo mitampo’g 12 puntos. Samtang sila si JR Migallen ug Arnel Colanse nagkumboya’g 21 puntos aron pangulohan sab ang Red team.
Puntos matag usa
ORANGE (79) – Colina 19, Ipili 19, Ortiz 13, Tecson 10, Perolino 8, Labares 5, Menaling 3, Gonzaga 2.
MAROON (74) – Aton 15, Anghay 12, Aniñon 11, Obra 7, Rodriguez 7, Tecson 4, Colina 4, Cabunilas 2, Pilapil 2, Caballero 2.
Ikaduhang duwa:
GRAY (59) – Marturillas 23, Castardo 12, Feniza 8, Lepiten 7, Rico 4, Castañeda 2.
RED (59) – Migallen 11, Colanse 10, Miñoza 8, Conahap 8, Castro 5, Ramirez 4, Fick 2, Villarin 2. (BANAT NEWS)
- Latest
